Sport27 Prill 2023, 16:01

Të martën kombëtarja e femrave mëson rivalët, ja kundërshtaret e mundshme të Shqipërisë për Ligën e Kombeve

Shkruar nga Pamfleti

Të martën kombëtarja e femrave mëson rivalët, ja

Shqipëria e vajzave do të njohë të martën e 2 majit ekipet kundërshtare që do të ketë përballë në UEFA Nations League 2023-2024 me shortin që do të hidhet në selinë qendrore të UEFA-s në Zvicër dhe do të nisë në ora 13:00.

Kombëtarja e drejtuar nga trajneri Armir Grima e ka tashmë një panoramë të skuadrave rivale që mund të ketë në grup në këtë edicion të parë për vajza, që pritet të ngrejë siparin nga shtatori i këtij viti dhe të përmbyllë sfidat në muajin dhjetor të po këtij viti. Ndërkaq, finalet dhe ngjitjet apo rëniet në Ligat A, B dhe C do të zhvillohen mes datave 21 dhe 28 shkurt të vitit të ardhshëm.

Falë rezultatit historik të arritur në kualifikueset e kaluara, ku vajzat kuqezi grumbulluan si kurrë më parë 10 pikë në kualifikueset e vlefshme për Botërorin 2023, Shqipëria renditet në vendin e 32 në klasifikimin përfundimtar të UEFA-s dhe është ngjitur kështu në Ligën B.

Kjo ligë është e ndarë në katër vazo me nga katër skuadra secila, në total 16 skuadra. Kombëtarja shqiptare gjendet në vazon e katërt, së bashku me Greqinë, Bjellorusinë dhe Kroacinë, kundërshtarë me të cilët nuk do të mund të përballet dot në këtë edicion.

Ekipet e tjera të Ligës B, që priten të jenë edhe rivalët e mundshëm të Shqipërisë në Ligën e Kombeve janë të ndarë në tre vazo të tjera me nga katër skuadra secila, ku në vazon e parë gjenden: Irlanda, Polonia, Çekia dhe Finlanda. Në vazon e dytë janë: Serbia, Sllovenia, Irlanda e Veriut dhe Rumania, ndërsa në vazon e tretë gjenden ekipe si: Ukraina, Bosnje – Hercegovina, Sllovakia dhe Hungaria.

Ndeshjet do të zhvillohen sipas sistemit vajtje-ardhje, ku në muajin shtator do të luhen dy ndeshjet e para, në muajin tetor do të zhvillohen dy takimet e radhës dhe ndeshjet përmbyllëse do të luhen në muajin nëntor-dhjetor.

Sipas skemës së përcaktuar nga UEFA, katër ekipet e Ligës B që dalin në krye të grupeve përkatëse do të ngjiten direkt në Ligën A, ndërsa katër ekipet e renditura në vendet e dyta në Ligën B do të përballen me katër skuadrat e renditura në vendet e treta në Ligën A, ku fituesit do të qendrojnë/zbresin në Ligën A/B.

Tre ekipet e renditura në vendet e treta në Ligën B do të luajnë kundër tre ekipeve të renditura më mirë në grupin C, ndërsa vendi i tretë më i dobët në Ligën B dhe katër vendet e fundit të secilit grup do të zbresin automatikisht në Ligën C.

kombëtarja e femrave liga e kombeve