FLASH

TAGS-AT E DITES

Volodymir Zelensky

Na ndiqni edhe në
KONTAKT TE DHENAT PERSONALE COOKIES
“Më mirë një kloun për president”, si po e sfidon të gjithë botën Volodymir Zelensky - Bota

TAGS-AT E JAVËS

Bota18 Mars 2022, 12:33

“Më mirë një kloun për president”, si po e sfidon të gjithë botën Volodymir Zelensky

Shkruar nga Pamfleti
“Më mirë një kloun për president”, si po e

Edhe pse vetëm pak vite më parë mbante hundën e huqe të një klouni, e gjitha bota po e merr seriozisht Volodymyr  Zelenskyn.

Presidenti ukrainas i cili po udhëheq me shumë vendosmëri rezistencën kundër pushtimit rus, është kthyer shumë shpejt në një personazh të njohur për të gjithë botën.

Është e vërtetë që një nga arsyet pse kjo gjë po ndodh, është mbështetja kundrejt vetë kauzës ukrainase, por problemet ekzistente edhe dikur, nuk morën të njëjtën përkrahje në kohën kur Petro Poroshenko ishte president.

Por në një kohë kur e gjithë bota u gjend para një sfide të madhe dhe rrezikut për luftë bërthamore, Zelensky u bë mburojë  për të gjithë ndërsa shfaqej në videot e tij të njëpasnjëshme me bluzën tipike ngjyrë të gjelbër dhe me kryqin mbi të.

Duke lënë mënjanë inskenimet dhe propagandën, Zelensky ka mbledhur guximin dhe  i ka bërë thirrje gjithë botës për të ndihmuar vendin e tij, ka bërë kërkesë për anëtarësim në BE dhe madje ka kritikuar disa herë NATO-n apo vendet e Perëndimit, se nuk kanë bërë mjaftueshëm për të ndihmuar.

Ai i ka kujtuar të gjithëve historinë, duke kërkuar që asgjë të mos përsëritet.

Sigurisht, ndihma më e madhe për Zelenskyn është vetë Putini. E kundërta e frymës pozitive që ish-komediani përçon. Putin shfaqet me kostum dhe kravatë gjithë kohës, mban në distanca qesharake bashkëpunëtorët e tij dhe bën fjalime të mbuluara me tymnaja historike. Madje edhe komunikimet i ka të regjistruara paraprakisht duke krijuar një ndjenjë të ftohtë dhe komunikim jointeraktiv që e largon Putinit sa më shumë nga populli i tij rus, i cili ka tentuar disa herë të protestojë kundër luftës.

Prandaj Zelensky shfaqet gjithnjë shumë më i besuar se Putin, duke bërë që shumë vende të Perëndimit të thyejnë politikat historike dhe të ndërhyjnë në konfliktin që ka prekur të gjithë botën.

Madje retorika perfekte e Zelenskyt mund të shihet edhe nga reagimet që shkakton sa herë që mban video-konferenca me liderët perëndimore. Ata ngrihen në këmbë, duartrokasin, qajnë dhe madje edhe qeshin nga shakatë retorike.

Ai e di se cilat janë pikat e ndjeshme të audiencës: me Kongresin Amerikan përmendi 11 shtatorin dhe Pearl Harborin, në Parlamentin anglez citoi Shekspirin dhe Churchillin. Gjithçka në retorikën e tij është e përzgjedhur me delikatesë.

Presidenti ukrainas do të kishte çdo arsye për t’ju përulur perëndimorëve në mënyrë që të marrë mbështetjen që i nevojitet dëshpërimisht, megjithatë ai nuk e ul kurrë kokën dhe ua plas të vërtetat në sy.  Zelensky nuk frikësohet as kur i drejtohet Moskës, as kur flet në Bruksel, Uashington, Londër, Berlin.

Autenticiteti i tij ka shkaktuar një impakt të madh edhe në  botën e mediave sociale, tashmë e ndaluar në Rusinë e Putinit.

Në Instagram Zelensky ka 16 milionë ndjekës (ai kishte tashmë 9 milionë para pushtimit). Në Twitter, presidenti ukrainas kishte 450,000 më 22 shkurt, ndërsa tani ka mbi pesë milionë e gjysmë. Nëse fuqia e mediave sociale do të llogaritej njësoj me tanket, Ukraina do ta kishte fituar tashmë luftën. /Corriere della Sera/ Pamfleti/

Bota Ukraina Zelensky

Bota