FLASH
Shkruar nga Pamfleti
Për herë të parë, grupi koordinues i protestës i drejtohet me një letër publike përfaqësive diplomatike. Në dokument renditen pesë kërkesat kryesore, nga dorëheqja e Edi Ramës te qeveria teknike dhe reforma kushtetuese.
Pas 27 ditësh protestë të pandërprerë para Kryeministrisë, lëvizja qytetare ka ndërmarrë një tjetër hap, duke iu drejtuar me një letër publike ambasadorëve dhe shefave të misioneve diplomatike të vendeve perëndimore të akredituara në Shqipëri.
Në letrën e firmosur nga Grupi Koordinues i Protestës, organizatorët deklarojnë se lëvizja përfaqëson një mobilizim të gjerë dhe paqësor qytetar, i cili kërkon rikthimin e demokracisë funksionale, shtetit të së drejtës dhe përgjegjshmërisë politike.
Për herë të parë bëhen publikë edhe emrat e anëtarëve të grupit koordinues të protestës: Entela Koja, Arben Kola, Megan Balaj, Edviol Kulluri, Luçjana Kokaj, Gentjan Progni, Gjon Ndoj, Etleva Merko, Everest Bardhi, Përparim Gjeka, Mevlan Mata, Ilir Xhemalaj dhe Marjen Rama.
Në dokument, protestuesit paraqesin pesë kërkesat që i cilësojnë të panegociueshme.
Në krye të tyre qëndron dorëheqja e kryeministrit Edi Rama dhe e qeverisë aktuale, të cilën e konsiderojnë hapin e parë drejt një ripërtëritjeje demokratike.
Kërkesa e dytë është krijimi i një qeverie teknike transitore jopartiake me mandat 12-mujor, e cila do të administrojë procesin e reformave dhe përgatitjen e zgjedhjeve.
Protestuesit kërkojnë gjithashtu një reformë tërësore kushtetuese, që sipas tyre duhet të miratohet me referendum popullor. Në këtë reformë përfshihet ndryshimi i Kodit Zgjedhor, reformimi i ligjit për financimin e partive politike dhe organizatave të shoqërisë civile, si edhe kufizimi i mandatit të kryeministrit në jo më shumë se dy mandate gjatë gjithë jetës politike.
Një tjetër kërkesë lidhet me shfuqizimin e ndryshimeve në Ligjin për Zonat e Mbrojtura, Ligjin për Trashëgiminë Kulturore, Paketën e Maleve dhe kuadrin ligjor për Investimet Strategjike, të cilat organizatorët i konsiderojnë si akte që kanë dëmtuar interesin publik.
Në pikën e fundit të letrës, grupi koordinues propozon hartimin e një kontrate të re shoqërore mes qytetarëve dhe shtetit, përmes konsultimeve me intelektualë, ekspertë teknikë dhe përfaqësues jopartiakë të shoqërisë civile.
Në përfundim të letrës, organizatorët u bëjnë thirrje përfaqësive diplomatike që të marrin në konsideratë seriozitetin e lëvizjes qytetare dhe të mbështesin, sipas tyre, një zgjidhje paqësore, demokratike dhe gjithëpërfshirëse të krizës politike në Shqipëri.
Dërgimi i kësaj letre shënon kontaktin e parë zyrtar të organizatorëve të protestës me trupin diplomatik, ndërsa revolta qytetare hyn në javën e katërt dhe organizatorët kanë paralajmëruar se mobilizimi do të vijojë edhe në ditët në vijim.
Letra e plotë
Shkëlqesive Tuaja,
Ambasadorëve dhe Shefave të Misioneve të vendeve perëndimore të akredituar në Republikën e Shqipërisë
Lënda: Njoftim mbi kërkesat e protestuesve
Shkëlqesi,
Në emër të Grupit Koordinues të Protestës, që përfaqëson një lëvizje të gjerë dhe paqësore qytetare, e cila ka mobilizuar qytetarët shqiptarë për njëzet e shtatë ditë radhazi, kemi nderin t’ju drejtohemi me frymë transparence, përgjegjësie demokratike dhe respekti për vlerat që bashkojnë vendin tonë me komunitetin euroatlantik.
Shqipëria ndodhet në një moment përcaktues të zhvillimit të saj demokratik. Qytetarët e mbledhur në mënyrë paqësore në sheshet publike në mbarë vendin po ushtrojnë të drejtën e tyre themelore për shprehje qytetare, të udhëhequr nga një angazhim i thellë për shtetin e së drejtës, qeverisjen demokratike dhe dinjitetin njerëzor.
Në këtë kontekst, Grupi Koordinues i Protestës paraqet me respekt kërkesat e mëposhtme, të cilat pasqyrojnë vullnetin e popullit sovran:
1. Dorëheqjen e Kryeministrit dhe të Qeverisë aktuale, si një hap thelbësor dhe i panegociueshëm drejt ripërtëritjes demokratike.
2. Krijimin e një qeverie kalimtare teknike, jopartiake, me mandat dymbëdhjetëmujor për të mbikëqyrur një proces reformash të besueshëm dhe të paanshëm.
3. Reformë tërësore kushtetuese, të mbështetur në parimin e barazisë së plotë të të gjithë qytetarëve shqiptarë para ligjit dhe që të miratohet përmes referendumit popullor.
Kjo reformë duhet të përfshijë, ndër të tjera:
Reformimin e Kodit Zgjedhor.
Reformimin e legjislacionit që rregullon financimin e partive politike dhe organizatave të shoqërisë civile.
Vendosjen e kufizimit të mandateve për postin e Kryeministrit, duke kufizuar çdo individ në jo më shumë se dy mandate, të plota ose të pjesshme, gjatë karrierës së tij politike.
4. Korrigjime të menjëhershme ligjore, duke përfshirë:
Shfuqizimin e ndryshimeve në Ligjin për Zonat e Mbrojtura (Ligji nr. 21/2024).
Shfuqizimin e ndryshimeve në Ligjin për Trashëgiminë Kulturore.
Shfuqizimin e paketës ligjore të njohur si "Paketa e Maleve".
Shfuqizimin e kuadrit ligjor që rregullon Investimet Strategjike.
5. Hartimin e një kontrate të re shoqërore ndërmjet qytetarëve dhe shtetit, që do të zhvillohet përmes konsultimeve të gjera me intelektualë të pavarur, ekspertë teknikë dhe përfaqësues jopartiakë të shoqërisë civile, në përputhje me propozimet e lëvizjes qytetare.
Këto kërkesa përfaqësojnë shprehjen e qartë dhe legjitime të një populli sovran, të përkushtuar ndaj vlerave demokratike dhe shtetit të së drejtës. Me respekt ju bëjmë thirrje që të merrni në konsideratë seriozitetin dhe sinqeritetin e kësaj lëvizjeje qytetare dhe të mbështesni një zgjidhje paqësore, demokratike dhe gjithëpërfshirëse të krizës aktuale politike në Shqipëri.
Mbetemi në dispozicionin tuaj për çdo komunikim të mëtejshëm dhe besojmë në angazhimin tuaj të vazhdueshëm për demokracinë dhe dinjitetin njerëzor në Shqipëri, si pjesë e vlerave tona të përbashkëta evropiane.
Ju lutemi pranoni shprehjen e konsideratës sonë më të lartë.
Brravo shum bukur ,por shikoni moshen e 3 qe skan lek te jetojne
Bravo, tani fituat. Si i behet nese del nje grup tjeter dhe i dergon ambasadave leter qe Rama te rri kryeminister. Cte bejne te shkretet?? Pse i futet te huajt ne siklet, tani filluan dhe pushimet e veres. Ky Kola qe e ka shkrimin si te pules do zevendesoj Ramen ne takime nderkombetare , do flase ne OKB , do takoj Macron, Melonin, do mbroje flamingot,Vjosen, Zvernecin e ku di une. Harron qe duhet ti hypi shqiponjes ne shpine te takoj gjyshin ne maj te malit. Kaq katunare jemi qe te na perfaqesojne keta te mbaruar.
Janë emra që nuk tregojnë absolutisht asgjë Nobody. Protesta ka trup, por jo kokë. Pas 27 ditësh zbulojnë pjesërisht veten dhe bëjnë lëvizjen më bosh të mundshme. Nuk drejtohet një lëvizje e fuqishme nga guida turistike. E frikshme.
Mirè shumé,por atè komisionin e mèparshèm: Kumen, Bogdanin ( Çepanin) etj.etj.kush i shkarloj ?Çdo ditè kèta grupe, grupe, sa komisione do formojnè ?