FLASH
Shkruar nga Pamfleti
Në Pallatin e Kongreseve po zhvillohen homazhet në nderim të liderit historik të Partisë Socialiste, Fatos Nano, i cili u nda nga jeta në moshën 73-vjeçare.
Të pranishëm janë familjarë të Fatos Nanos, mes tyre bashkëshortja e tij, Xhoana Nano, djali Sokoli, vajza Edlira, dhe ish-bashkëshortja Rexhina.
Homazhet publike kanë nisur që prej orës 8:30 dhe do të zgjasin deri në orën 11:00. Me qindra qytetarë po i japin lamtumirën e fundit ish-Kryeministrit, që për më shumë se dy dekada ishte një prej figurave më të rëndësishme politike në tranzicionin shqiptar.
Pas homazheve publike, nga ora 11:15 deri në 11:45, do të zhvillohen homazhet e personaliteteve të larta të shtetit dhe trupit diplomatik. Mes tyre, do të jenë Presidenti i Republikës, Kryetari i Kuvendit, dhe Kryeministri Edi Rama, pasuesi i Nanos në drejtimin e Partisë Socialiste. Rama do të mbajë një fjalim për të kujtuar figurën politike të Nanos, ndërsa bashkëshortja e tij, Xhoana Nano, pritet të mbajë fjalimin në emër të familjes.
Në ceremoni do të marrin pjesë edhe përfaqësues të lartë nga rajoni: Kryeministri në detyrë i Kosovës, Albin Kurti, i shoqëruar nga ministra dhe deputetë të kabinetit të tij; zëvendëskryeministri i Malit të Zi; si dhe kreu i BDI-së në Maqedoninë e Veriut, Ali Ahmeti.
Në respekt për kontributin e Fatos Nanos në jetën publike dhe politike të vendit, 2 nëntori është shpallur edhe ditë zie kombëtare. Të gjithë flamujt në institucionet shtetërore janë ulur në gjysmë shtizë dhe në orën 12:00 do të ndalojë çdo aktivitet për të mbajtur një minutë heshtje.
Në fund, me nderime, trupi i Nanos do të niset në orën 12:05 nga Pallati i Kongreseve për në banesën e fundit, që do të jetë në Sharrë. Familja ka kërkuar të kryejë në privatësi, në shtëpi edhe shërbesën e ritualit ortodoks për Fatos Nanon, i cili ishte i pagëzuar dhe i martuar me Xhoanën në Kishën Ortodokse Shqiptare.
Nuk eshte Rexhina por vajza e tij