Aktualitet24 Maj 2024, 10:54

Vrasja e Pjerin Xhuvanit, shtyhet seanca për Arbër Paplekajn; shkak mungesa e prokurorit

Shkruar nga Pamfleti
Vrasja e Pjerin Xhuvanit, shtyhet seanca për Arbër Paplekajn; shkak
Arbër Paplekaj

Shtyhet seanca për Arbër Paplekajn, i dënuar për vrasjen e Pjerin Xhuvanit, i cili mbeti i vrarë në prag të zgjedhjeve parlamentare në vitin 2021 në Elbasan.

Shkak i shtyrjes së seancës është bërë mungesa e prokurorit të çështjes Gent Xholi. Prokurori ka njoftuar gjykatën se do mungojë për një problem personal.

Sot në seancë priteshin konkluzionet e palëve, ndërsa vendimi u shty për në datë 5 qershor, ora 09:30.

Arbër Paplekaj është dënuar me 22 vite burg. Ngjarja ndodhi në lagjen “5 Maj” të qytetit të Elbasanit. Nga shkëmbimi i zjarrit mbeti i vrarë aktivisti i Partisë Socialiste, Pjerin Xhuvani ndërsa të plagosur mbetën një efektive policie Xhensila Sota, edhe tre persona të tjerë.

Përplasja me armë ndodhi për shkak të zgjedhjeve. Në vendin e ngjarjes mbërriti më pas nëndrejtori i Policisë së Elbasanit, Abert Nushi dhe disa efektivë të Shqiponjave. Pas mbërritjes së policisë, në vendngjarje erdhi edhe një automjet me simpatizantë të PS-së.

Në këtë moment ka nisur edhe shkëmbimi i zjarrit mes palëve. Pak minuta pas ngjarjes u vetëdorëzua në policia ish-efektivi i RENEA-s Arbër Paplekaj, i cili dyshohet se ka qëlluar me armë ndaj Xhuvanit gjatë shkëmbimit të zjarrit. Ky i fundit, ka thënë vazhdimisht se ka qëlluar për vetëmbrojtje.