FLASH
Shkruar nga Pamfleti
Presidenti i Këshillit Evropian konfirmoi besimin te institucionet e Malit të Zi, ndërsa presidenti serb Aleksandar Vuçiç njoftoi se do të marrë pjesë në Samitin BE–Ballkani Perëndimor më 5 qershor...
Presidenti i Këshillit Evropian, António Costa, deklaroi gjatë një konference për shtyp me presidentin e Serbisë, Aleksandar Vuçiç, se ka besim të plotë te autoritetet e Malit të Zi për garantimin e sigurisë së të gjithë pjesëmarrësve në Samitin BE–Ballkani Perëndimor, i cili do të mbahet më 5 qershor në Tivat.
Costa e bëri këtë deklaratë pasi u pyet nga gazetarët për paralajmërimin e sigurisë të lëshuar një natë më parë nga Agjencia e Sigurisë dhe Informacionit e Serbisë (BIA). Sipas këtij vlerësimi, udhëtimi i Vuçiçit drejt Malit të Zi do të ishte i pasigurt për shkak të pranisë së pretenduar në vend të Radoje Zvicerit, i identifikuar si drejtues i klanit kriminal të Kavaçit.
Paralajmërimet për sigurinë e presidentit serb pasuan një incident të ndodhur të mërkurën, kur një fluturim çarter nga Beogradi me 87 pasagjerë u kthye nga Tivati në Serbi. Policia malazeze dhe Agjencia Kombëtare e Sigurisë e vlerësuan fluturimin si rrezik për sigurinë.
Portali malazez Vijesti raportoi se shumica e shtetasve serbë të kthyer kanë precedentë penalë dhe prej vitesh përmenden në mediat serbe si persona të ngarkuar me “detyra të veçanta nga regjimi i SNS-së”. Sipas raportimit, qëllimi i tyre në Mal të Zi mbetet i paqartë.
Mbrëmjen e së mërkurës, disa përfaqësues të partisë në pushtet në Serbi i bënë thirrje publike Vuçiçit të mos udhëtojë në Mal të Zi. Megjithatë, gjatë konferencës së sotme, ai konfirmoi pjesëmarrjen në samit, duke deklaruar se do të “thotë gjithçka që ka për të thënë ballë për ballë”, duke iu referuar autoriteteve malazeze.
Në fjalën e tij hyrëse, Costa theksoi se zgjerimi i Bashkimit Evropian është sot më shumë se kurrë një domosdoshmëri strategjike dhe jo vetëm një mundësi.
“Megjithatë, zgjerimi bazohet në ndërtimin e besimit. Rruga përpara është kërkuese, por drejtimi është i qartë. Duhet të përqendrohemi në tre prioritete kryesore”, deklaroi presidenti i Këshillit Evropian.
Sipas tij, këto prioritete janë forcimi i marrëdhënieve të fqinjësisë së mirë dhe bashkëpunimit rajonal, përafrimi me politikat dhe vlerat e Bashkimit Evropian, veçanërisht me Politikën e Përbashkët të Jashtme dhe të Sigurisë, si dhe zbatimi i reformave në vazhdim.
Duke folur për reformat, Costa veçoi nevojën për zbatimin e plotë të rekomandimeve të Komisionit të Venecias lidhur me legjislacionin për gjyqësorin dhe prokurorinë, krijimin e një Këshilli të ri të Autoritetit Rregullator për Mediat Elektronike në mënyrë transparente dhe gjithëpërfshirëse, si dhe reformimin e kuadrit zgjedhor në përputhje me rekomandimet e ODIHR-it.
Lini një Përgjigje