FLASH
Shkruar nga Pamfleti
Kryeministri i Hungarisë, Viktor Orban, deklaroi se Evropa po përgatitet për luftë me Rusinë, ndërsa sipas tij Hungaria do të mbetet një “ishull paqeje dhe sigurie” në një botë të paqëndrueshme.
Duke folur në një tubim kundër luftës në Budapest, Orban tha se Budapesti nuk do të marrë pjesë në përshkallëzimin e konfliktit në Ukrainë.
“Na presin kohë të vështira, me luftën që po afron. Bashkimi Evropian tashmë ka kaluar në një ekonomi lufte dhe dëshiron të dërgojë më shumë para, armë dhe ushtarë në Ukrainë. Nuk mund ta parashikojmë ditën ose orën kur ushtari i parë i BE-së do të hyjë në Ukrainë, por kjo do të ndodhë dhe duhet të qëndrojmë larg saj. Jam i përkushtuar ta mbaj Hungarinë si një ishull paqeje dhe sigurie në këtë botë të paqëndrueshme”, tha ai.
Sipas Orbánit, hungarezët kanë përvojë historike me konfliktet dhe nuk dëshirojnë që brezat e rinj të përballen me një realitet të tillë.
“Ne nuk duam një të ardhme të tillë për fëmijët tanë”, theksoi ai, duke shtuar se të rinjtë hungarezë do t’ia kushtojnë jetën e tyre Hungarisë në vend që të vdesin për Ukrainën.
Deklaratat e kryeministrit hungarez vijnë në një moment kur Bashkimi Evropian dhe vendet e NATO-s kanë shtuar mbështetjen ushtarake dhe financiare për Ukrainën në përballjen e saj me Rusinë. Budapesti ka mbajtur një qëndrim më të rezervuar ndaj politikave të BE-së në këtë drejtim dhe ka kërkuar vazhdimisht negociata për t’i dhënë fund konfliktit.
Hungaria ka kundërshtuar disa iniciativa të Bashkimit Evropian që lidhen me ndihmën ushtarake për Kievin dhe sanksionet ndaj Moskës, duke argumentuar se prioriteti duhet të jetë arritja e një armëpushimi dhe fillimi i bisedimeve për paqe.
Lini një Përgjigje