FLASH
Shkruar nga Pamfleti
Kryeministrja italiane Giorgia Meloni deklaroi në Parlament se Italia nuk është në luftë dhe nuk ka ndërmend të përfshihet në konflikt. Mesazhi u dha gjatë raportimit të saj për situatën në Lindjen e Mesme dhe për përgatitjet e Këshillit Europian që do të zhvillohet më 19 dhe 20 mars.
Në Senat, shumica miratoi rezolutën e paraqitur nga qeveria me 102 vota pro, 66 kundër dhe një abstenim. Dokumenti dënon rolin destabilizues të Iranit në rajon dhe shpreh mbështetje për popullin iranian. Opozita paraqiti disa rezoluta alternative gjatë debatit parlamentar.
Meloni theksoi se deri tani nuk ka pasur kërkesa për përdorimin e bazave amerikane në territorin italian për operacione ushtarake. Ajo shtoi se çdo vendim i mundshëm në këtë drejtim do t’i takonte Parlamentit.
Kryeministrja u ndal edhe te pasojat ekonomike të krizës, duke përmendur rritjen e çmimeve të energjisë dhe karburanteve. Sipas saj, qeveria është e gatshme të marrë masa kundër spekulimeve në treg dhe mund të vendosë taksa më të larta për kompanitë që përfitojnë nga situata. Në rast se rritja e çmimeve do të bëhet e qëndrueshme, mund të aktivizohet edhe mekanizmi i “akcizave të lëvizshme” për të ulur barrën për qytetarët.
Gjatë fjalës së saj, Meloni u bëri thirrje edhe forcave opozitare për një qëndrim të përbashkët në këtë moment të vështirë ndërkombëtar. “Italia duhet të flasë me një zë të vetëm”, tha ajo, duke shtuar se është e gatshme të dialogojë me opozitën.
Megjithatë, kritikat nga opozita nuk munguan. Partia Demokratike kërkoi që qeveria t’u kërkojë qartë Shteteve të Bashkuara dhe Izraelit të ndryshojnë kursin e tyre dhe kërkoi garanci që bazat amerikane në Itali të mos përdoren për operacione ushtarake kundër Iranit.
Gjatë seancës pati edhe protesta simbolike nga senatorët e Lëvizjes 5 Yjet, të cilët mbanin kapele të kuqe me mbishkrimin “No alla guerra”.
Në debat u prekën edhe çështje të tjera, përfshirë çmimet e energjisë, politikat migratore dhe mbështetjen për Ukrainën. Ndërkohë, jo të gjithë deputetët e kampit të djathtë mbështetën rezolutën e qeverisë. Përfaqësuesit e grupit “Futuro Nazionale”, të lidhur me Roberto Vannacci, votuan kundër, duke kritikuar përdorimin e fondeve publike për mbështetjen e Ukrainës dhe duke kërkuar më shumë fokus te ekonomia italiane.
Pas votimit në Senat, debati u zhvendos në Dhomën e Deputetëve, ku pritet të zhvillohen diskutime të tjera dhe votime mbi rezolutat përpara samitit të ardhshëm të Këshillit Europian.
Lini një Përgjigje