FLASH
Shkruar nga Pamfleti
Mes sfondit të zymtë të funeralit të Papës Françesku, një takim i rëndësishëm diplomatik u shpalos brenda Bazilikës së Shën Pjetrit, ndërsa presidenti i SHBA Donald Trump dhe ai ukrainas Volodymyr Zelensky u takuan për një diskutim të shkurtër, por siç thuhet "produktiv". Takimi u zhvillua pak minuta para fillimit të meshës mortore. Takimi ndodhi në një dhomë anësore të bazilikës historike, ku të dy udhëheqësve iu bashkua presidenti francez Emmanuel Macron.
Përpara takimit të tij ballë për ballë me homologun ukrainas Volodymyr Zelensky në Bazilikën e Shën Pjetrit, presidenti i SHBA-së Donald Trump thuhet se i tha presidentit francez Emmanuel Macron : “Ju nuk jeni në vendin e duhur këtu”.
Tabloidi britanik “The Sun” e zbuloi këtë pasi u konsultua me një eksperte të leximit të buzëve, Nicola Hickling.
Një video e publikuar pasditen e djeshme nga stafi i Shtëpisë së Bardhë tregon Trump dhe Zelensky, teksa shkojnë drejt karrigeve të ngritura për ta nga zyrtarët e Vatikanit, duke u bashkuar me Macron, i cili përqafon presidentin ukrainas. Në atë moment Trump u zgjat dorën të dyve dhe i tërheq drejt vetes. Më pas i drejtohet Macronit. “Ju nuk jeni në vendin e duhur këtu. Unë kam nevojë që ju të më bëni një nder, nuk keni pse të jeni këtu,” thuhet se i tha Macronit drejtuesi i Shtëpisë së Bardhë, ndërsa Zelensky pohoi me kokë në shenjë miratimi.
Pranë tre liderëve, shihet edhe një prift që kthen kokën anash pasi ka dëgjuar fjalët e Trump. The Sun i kërkoi gjithashtu Hickling, një ekspert i leximit të buzëve, të rishikonte pamjet e takimit të mëpasshëm të Trump dhe Zelenskyt, gjatë të cilit presidenti ukrainas thuhet se tha: “Do të doja ta bënit, por jo në këtë mënyrë”, për të cilën Trump thuhet se u përgjigj: “Kjo është një strategji shumë interesante. Ju keni disa garanci.”
Lini një Përgjigje