FLASH
Shkruar nga Pamfleti
Një ngjarje e rëndë me armë zjarri ndodhi të dielën në shtetin e Kentakit, SHBA, ku disa persona, përfshirë një polic shtetëror, mbetën të plagosur pas një sulmi që përfundoi në një kishë në qytetin Lexington.
Autoritetet konfirmuan se autori i sulmit, ende i paidentifikuar, është vrarë. Sipas zëdhënëses së Policisë Shtetërore të Kentakit, Sherry H. Bray, autori qëlloi drejt një efektivi policie dhe më pas u arratis, për të përfunduar në Kishën Baptiste “Richmond Road”.
“Konfirmojmë se polici po merr ndihmë mjekësore,” tha Bray, duke shtuar se kishte “disa të plagosura në kishë” dhe se ekipet e emergjencës po trajtonin të lënduarit në vendngjarje.
Policia Shtetërore deklaroi se ngjarja e ndërlidhur me policinë ndodhi rreth orës 11:35 të mëngjesit, me orën lokale, pa dhënë detaje se ku ndodhi saktësisht dhe cilat ishin motivet e të shtënave.
Guvernatori i Kentakit, Andy Beshear, deklaroi të dielën se ishte i informuar për një “seri incidentesh në Lexington, që përfshijnë një përplasje me armë me një polic dhe një tjetër sulm të armatosur në Kishën Baptiste, me disa të plagosur”.
Dëshmitarë në zonë, përfshirë menaxherin e një restoranti aty pranë, raportuan për një prezencë të madhe të policisë dhe dëgjuan të shtëna. Zona përshkruhet si rurale, me shumë toka bujqësore.
Nuk është konfirmuar ende nëse ky incident ka lidhje me disa të shtëna të raportuara të dielën në aeroportin Blue Grass, gjithashtu në Lexington. Një zëdhënëse e aeroportit tha se “një incident” ndodhi në një rrugë brenda pronës së aeroportit.
Lini një Përgjigje