FLASH
Shkruar nga Pamfleti
Autopsitë e kryera mbi trupat e shtetasve italianë që humbën jetën në tragjedinë e Crans-Montana kanë nxjerrë në pah elemente të reja, të cilat forcojnë dyshimet se disa prej viktimave mund të kishin mbijetuar nëse nuk do të ishin penguar nga kushtet e krijuara në ambientin ku shpërtheu zjarri.
Sipas rezultateve mjeko-ligjore, viktimat nuk kishin konsumuar sasi të konsiderueshme alkooli dhe, në momentin kur flakët përfshinë diskotekën “Le Constellation”, ato ishin të vetëdijshme dhe fizikisht të afta për t’u larguar. Megjithatë, hetuesit dyshojnë se arratisja e tyre u pengua nga dalja e emergjencës, e cila rezultonte e mbyllur.
Ky përfundim mbështetet në autopsitë e kryera mbi trupat e Achille Barosi, Chiara Costanzo, Giovanni Tamburi, Riccardo Minghetti, Sofia Prosperi dhe Emanuele Galeppini.
Tragjedia, e ndodhur gjatë natës mes 31 dhjetorit dhe 1 janarit, shkaktoi 41 viktima dhe 115 të plagosur, mes tyre edhe shtetas italianë. Raporti i ekspertizës mjeko-ligjore pritet t’i dorëzohet prokurorit Stefano Opilio në Romë, i cili po zhvillon hetime paralele me autoritetet zvicerane për të përcaktuar shkaqet dhe përgjegjësitë e ngjarjes.
Në Itali, pronarët e lokalit, Jacques dhe Jessica Moretti, po hetohen për vrasje nga pakujdesia në rrethana të shumëfishta, plagosje dhe zjarrvënie nga pakujdesia. Megjithatë, hetimet mund të zgjerojnë më tej rrethin e përgjegjësive pas mbërritjes së dokumentacionit nga Prokuroria e Sionit, e cila po zhvillon një procedim më të gjerë ndaj 14 personave të dyshuar.
Ekspertiza mjeko-ligjore ka përcaktuar se shkaqet kryesore të vdekjes kanë qenë djegiet dhe, mbi të gjitha, asfiksia e shkaktuar nga monoksidi i karbonit.
Ndërkohë, hetimet në Zvicër kanë zbuluar se fillimisht janë kryer vetëm dy autopsi, ndërsa për viktimat e tjera ekzaminimet janë realizuar më vonë, në disa raste edhe pas kërkesave për zhvarrim nga familjarët. Gjithashtu, në disa certifikata vdekjeje nuk ishte përcaktuar qartë shkaku i vdekjes, një element i konsideruar thelbësor për procesin penal.
Vetëm tre ditë pas tragjedisë, trupat iu dorëzuan familjarëve, ndërsa autopsitë u urdhëruan më pas vetëm për një pjesë të viktimave, duke shkaktuar vonesa në hetimet mjeko-ligjore.
Paralelisht, në Itali është ashpërsuar pozita e çiftit Moretti. Një akuzë e re lidhet me një faturë që dyshohet të jetë falsifikuar për materialin akustik të përdorur në tavanin e lokalit, i cili sipas hetuesve mund të ketë favorizuar përhapjen e flakëve pasi u përfshi nga zjarri i shkaktuar nga elementët piroteknikë të përdorur gjatë shërbimit.
Sipas prokurorisë, dokumenti përmban mospërputhje të konsiderueshme dhe ekzistojnë dyshime të forta për falsifikim.
Hetuesit po analizojnë gjithashtu komunikime të brendshme të Jessica Moretti, në të cilat ajo jepte udhëzime për organizimin e spektakleve me fishekzjarrë brenda lokalit. Në një prej mesazheve të shqyrtuara, ajo paralajmëronte për rrezikun që paraqiste shkuma akustike në kontakt me qirinjtë shkëndijues, çka sipas hetuesve mund të tregojë se kishte dijeni për rrezikshmërinë e materialeve të përdorura.
Nga ana tjetër, avokatët e familjeve të viktimave po kërkojnë që akuza të rikualifikohet në “vrasje me dashje eventuale”, një vepër penale që parashikon dënime shumë më të rënda, deri në 20 vite burg.
Lini një Përgjigje