FLASH
Shkruar nga Pamfleti
Ulja e dy avionëve të veçantë qeveritarë nga i njëjti shtet, brenda më pak se një ore në aeroportin Esenboğa të Ankarasë, shkaktoi habi në qarqet diplomatike. Të dy avionët qeveritarë u nisën nga Republika Çeke, e cila dërgoi dy delegacione të ndryshme në samitin e NATO-s në Turqi.
I pari mbërriti kryeministri çek Andrej Babiš, i cili u prit nga ministri turk i Tregtisë, Ömer Bolat. Pak më vonë mbërriti avioni i dytë, me presidentin Petr Pavel në bord, i cili u prit nga ministri turk i Kulturës dhe Turizmit, Mehmet Nuri Ersoy. Praga nuk dha asnjë shpjegim se përse dy zyrtarët më të lartë të vendit nuk udhëtuan së bashku, megjithëse u nisën nga i njëjti aeroport në kryeqytetin çek.
Përplasja gjyqësore
Kjo situatë e paprecedentë është rezultat i armiqësisë së fortë personale dhe politike mes dy liderëve, e cila ishte përshkallëzuar prej muajsh në prag të samitit. Edhe pse tradicionalisht delegacionet çeke në NATO përfshijnë si kryeministrin, në cilësinë e kreut të qeverisë, ashtu edhe presidentin, si kreun e shtetit, muajin e kaluar Babiš i ndaloi Pavelit pjesëmarrjen.
Megjithatë, presidenti nuk u tërhoq. Ai iu drejtua menjëherë Gjykatës Kushtetuese të Republikës Çeke, e cila miratoi masa të përkohshme, duke detyruar kryeministrin t'i lejonte udhëtimin drejt Ankarasë.
Arsyet e vërteta të konfliktit
Zyrtarisht, Babiš argumentoi se kishte nevojë për më shumë hapësirë politike për të negociuar dhe për t'u shpjeguar aleatëve pse Republika Çeke është një nga vetëm tre vendet e NATO-s që nuk përmbush objektivat aktuale për shpenzimet e mbrojtjes.
Megjithatë, sipas raportimeve, dy liderët përplasen për çështje shumë më të thella, si vendimi i qeverisë për të ulur buxhetin e mbrojtjes, por edhe refuzimi i Pavelit për të emëruar në qeverinë Babiš një politikan të diskutueshëm të djathtë me qëndrime antisistem.
Sipas analistëve, përpjekja e kryeministrit për të përjashtuar presidentin ishte një goditje e drejtpërdrejtë në fushën ku Pavel konsiderohet figura dominuese. Petr Pavel është gjeneral në pension dhe më parë ka shërbyer si kryetar i Komitetit Ushtarak të NATO-s, një nga postet më të larta në hierarkinë e Aleancës, çka e bën përplasjen e tyre publike edhe më të fortë.
Lini një Përgjigje