FLASH
Shkruar nga Pamfleti
Çmimet e naftës dhe karburanteve mund të mbeten të larta deri në muajin shtator, edhe nëse Ngushtica e Hormuzit rihapet në një afat të shkurtër. Paralajmërimi vjen nga presidenti i kompanisë Rapidan Energy, Bob McNally, i cili vlerëson se tregjet globale të energjisë vazhdojnë të përballen me pasoja të forta nga lufta me Iranin.
Gjatë një interviste për "ABC News", McNally tha se mekanizmat që kanë ndihmuar deri tani në zbutjen e goditjeve në tregun e naftës po humbasin gradualisht efektin e tyre.
Një ndër faktorët kryesorë është tkurrja e rezervave strategjike të naftës së SHBA-së. Sipas të dhënave të Administratës së Informacionit të Energjisë, rezervat amerikane ranë me 7.9 milionë fuçi vetëm brenda një jave, si pasojë e ndërprerjeve në furnizimet globale të shkaktuara nga konflikti.
Ndërkohë, ende nuk ka qartësi nëse SHBA-ja dhe Irani do të arrijnë një marrëveshje paqeje. Presidenti Donald Trump kishte lënë të kuptohej se një marrëveshje mund të finalizohej gjatë fundjavës, por deri tani nuk ka konfirmim zyrtar.
Sipas McNally, nëse një marrëveshje arrihet dhe zbatohet, furnizimet me naftë mund të stabilizohen. Në të kundërt, tregjet mund të përballen me një valë të re rritjesh të çmimeve.
Ai paralajmëroi se çmimi i naftës mund të ngjitet në nivele mbi 100 dollarë për fuçi, ndërsa benzina në SHBA mund të arrijë deri në 5 dollarë për gallon, një nivel rekord.
Aktualisht, çmimi mesatar i benzinës në SHBA qëndron në 4.07 dollarë për gallon. Ndërkohë, nafta Brent, standardi ndërkombëtar i referencës, u mbyll në 82.25 dollarë për fuçi, ndërsa nafta amerikane në 84.29 dollarë.
Ekspertët e konsiderojnë rihapjen e Ngushticës së Hormuzit si një element kyç për stabilizimin e tregjeve globale. Kjo rrugë detare transporton rreth 20% të naftës botërore dhe ka qenë në qendër të tensioneve të fundit në rajon.
Sipas vlerësimeve të McNally, lufta ka shkaktuar humbjen e më shumë se një miliard fuçive naftë nga tregu global, duke krijuar një nga ndërprerjet më të mëdha të furnizimit në histori.
Lini një Përgjigje