FLASH
Shkruar nga Pamfleti
Presidenti i Shteteve të Bashkuara, Donald Trump, deklaroi se Irani po kërkon të zhvillojë bisedime me Uashingtonin, ndërkohë që operacionet ushtarake amerikane dhe izraelite kundër objektivave iraniane vazhdojnë.
Në një postim në rrjetin e tij Truth Social, Trump shkroi se kapacitetet ushtarake dhe udhëheqja iraniane janë goditur rëndë. “Mbrojtja ajrore, Forcat Ajrore, Marina dhe udhëheqja e tyre janë zhdukur. Ata duan të flasin. Unë thashë: ‘Tepër vonë!’”, theksoi ai.
Megjithatë, gjatë fundjavës presidenti kishte dhënë një mesazh tjetër, duke lënë të kuptohet se ishte i gatshëm të angazhohej në dialog me udhëheqësit iranianë pas nisjes së sulmeve. “Ata duan të flasin dhe unë kam rënë dakord të flas, kështu që do të flas me ta,” deklaroi Trump të dielën, duke shtuar se “duhej ta kishin bërë më herët”.
Para fillimit të operacionit ushtarak, SHBA-ja dhe Irani kishin zhvilluar tre raunde bisedimesh, ku raundi i fundit u mbyll javën e kaluar në Gjenevë.
Deklaratat e fundit të presidentit amerikan vijnë në një moment tensioni të lartë në rajon, ndërsa mbetet e paqartë nëse do të ketë një rifillim formal të negociatave apo nëse palët do të vazhdojnë përshkallëzimin ushtarak.
Lini një Përgjigje