FLASH
Shkruar nga Pamfleti
Reali i Madridit ka njoftuar se i ka dorëzuar UEFA-s një deklaratë zyrtare me shkrim lidhur me çështjen e njohur si “Negreira”, e cila vazhdon të jetë nën hetim nga autoritetet sportive dhe institucionale në Spanjë.
Në deklaratën e tij, klubi madrilen bën të ditur se ka vënë në dispozicion të UEFA-s dokumente dhe prova që, sipas tij, përforcojnë indiciet e bëra publike më herët lidhur me pagesat e dyshuara të kryera nga Barcelona ndaj Zhoze Maria Enrikez Negreira, ish-nënkryetar i Komitetit Teknik të Gjyqtarëve pranë Federatës Spanjolle të Futbollit.
Sipas Realit të Madridit, këto pagesa dyshohet se janë realizuar përmes strukturave të ndryshme korporative dhe se nuk shoqërohen me një justifikim financiar të verifikueshëm.
Klubi thekson se dokumentacioni i paraqitur synon të ndihmojë organet disiplinore të UEFA-s në hetimin e çështjes dhe të kontribuojë në zbardhjen e plotë të rrethanave që lidhen me këtë rast.
Çështja “Negreira” mbetet një nga skandalet më të debatuara në futbollin spanjoll dhe europian gjatë viteve të fundit. Ndërkohë, hetimet përkatëse vijojnë dhe ende nuk ka një vendim përfundimtar nga institucionet kompetente.
Lini një Përgjigje