FLASH
Shkruar nga Pamfleti
Kupa e Botës është eventi më i ndjekur sportiv në planet, por krahas emocioneve dhe spektaklit, historia e saj është shoqëruar edhe nga skandale që kanë tronditur opinionin publik. Disa prej tyre çuan në ndryshime të rëndësishme të rregullave të lojës, ndërsa të tjera njollosën përgjithmonë reputacionin e protagonistëve dhe institucioneve të futbollit.
"Turpi i Gijonit" (1982)
Ndeshja mes Gjermanisë Perëndimore dhe Austrisë në Botërorin e vitit 1982 konsiderohet si një nga episodet më të diskutueshme në historinë e turneut.
Gjermanët fituan 1-0 falë një goli të shënuar në minutat e para, rezultat që kualifikonte të dyja skuadrat dhe eliminonte Algjerinë. Pas golit, ritmi i lojës ra ndjeshëm, ndërsa të dy ekipet u akuzuan se shmangën çdo rrezik për të ruajtur rezultatin.
Reagimi i FIFA-s ishte i menjëhershëm. Që nga Botërori i vitit 1986, ndeshjet e fundit të fazës së grupeve zhvillohen në të njëjtën orë për të shmangur situata të ngjashme.
"Dora e Zotit" e Maradonës (1986)
Në çerekfinalen Argjentinë–Angli, Diego Armando Maradona shënoi një nga golat më të diskutuar të historisë, duke prekur topin me dorë para se ta dërgonte në rrjetë.
Arbitri nuk e konstatoi shkeljen dhe goli u pranua. Vetë Maradona më vonë e përshkroi episodin si të realizuar "pak me kokën e Maradonës dhe pak me Dorën e Zotit".
Vetëm katër minuta më vonë ai realizoi edhe atë që konsiderohet "Goli i Shekullit", pasi dribloi disa lojtarë anglezë përpara se të shënonte.
Argjentinë–Peru 6-0 (1978)
Në Botërorin e vitit 1978, Argjentinës i nevojitej një fitore me të paktën katër gola diferencë ndaj Perusë për të siguruar finalen. Vendasit triumfuan 6-0.
Rezultati u shoqërua me akuza për manipulim të ndeshjes, të lidhura edhe me regjimin ushtarak që drejtonte vendin në atë kohë. Megjithatë, pavarësisht dyshimeve të vazhdueshme, asnjëherë nuk u paraqitën prova që të vërtetonin këto pretendime.
Testi pozitiv i Maradonës (1994)
Botërori i fundit i Diego Maradonës përfundoi në mënyrën më të hidhur. Pas ndeshjes ndaj Nigerisë, ai rezultoi pozitiv për substancën e ndaluar efedrinë.
Legjenda argjentinase u përjashtua nga turneu dhe nuk veshi më fanellën e kombëtares, duke i dhënë fund karrierës ndërkombëtare në rrethana të diskutueshme.
"Beteja e Santiagos" (1962)
Përballja mes Kilit dhe Italisë në fazën e grupeve të Botërorit 1962 u kthye në një nga ndeshjet më të dhunshme të zhvilluara ndonjëherë.
Takimi u karakterizua nga përleshje, dy kartonë të kuq dhe ndërhyrje të përsëritura të policisë për të rivendosur rendin. Komentatori i BBC-së e përshkroi atë si "ndoshta shfaqjen më të turpshme në historinë e futbollit".
Shumaker ndaj Batiston (1982)
Në gjysmëfinalen Francë–Gjermani Perëndimore, portieri Harald Shumaker goditi rëndë Patrik Batiston, i cili mbeti pa ndjenja dhe pësoi dëmtime serioze, përfshirë humbjen e disa dhëmbëve.
Pavarësisht ashpërsisë së ndërhyrjes, arbitri nuk akordoi as faull dhe as ndëshkim për portierin gjerman, një vendim që vazhdon të konsiderohet ndër më të debatueshmit në historinë e Kupës së Botës.
Goditja me kokë e Zinedin Zidan (2006)
Finalja e Botërorit 2006 u shënua nga episodi që i dha fund karrierës së Zinedin Zidan me fanellën e Francës.
Pas një debati verbal me Marko Materacin në kohën shtesë, Zidan goditi me kokë në gjoks mbrojtësin italian dhe u ndëshkua me karton të kuq. Franca humbi më pas finalen ndaj Italisë me penallti.
Luis Suarez dhe pritja me dorë (2010)
Në çerekfinalen Uruguai–Ganë, Luis Suarez ndaloi me dorë një top që po hynte në portë në sekondat e fundit të kohës shtesë.
Sulmuesi u përjashtua me karton të kuq, por Gana humbi penalltinë dhe më pas u eliminua pas goditjeve nga pika e bardhë. Veprimi i Suarezit vazhdon të ndajë opinionin mes atyre që e konsiderojnë akt të pandershëm dhe atyre që e shohin si një sakrificë për skuadrën.
Skandali i korrupsionit në FIFA (2015)
Jo të gjitha skandalet e Kupës së Botës kanë ndodhur në fushën e lojës.
Në vitin 2015, autoritetet amerikane ngritën akuza ndaj një numri zyrtarësh të lartë të FIFA-s për ryshfet, mashtrim dhe pastrim parash. Hetimet ekspozuan praktika të dyshuara korruptive lidhur me të drejtat televizive dhe proceset e përzgjedhjes së vendeve organizatore të Botërorit, duke shkaktuar një krizë të thellë në qeverisjen e futbollit botëror.
Tragjedia e Andres Eskobarit (1994)
Mes të gjitha episodeve të errëta të Kupës së Botës, historia e Andres Eskobarit mbetet më e dhimbshmja.
Mbrojtësi kolumbian shënoi një autogol në humbjen ndaj Shteteve të Bashkuara, rezultat që ndikoi në eliminimin e Kolumbisë nga Botërori i vitit 1994.
Vetëm pak ditë pas kthimit në vendlindje, Escobari u vra me armë zjarri. Tragjedia e tij mbetet një kujtesë e fortë se pasionet e lidhura me futbollin mund të kenë pasoja tragjike edhe përtej fushës së lojës.
Lini një Përgjigje