FLASH
Shkruar nga Pamfleti
Ju ftojmë të ndiqni një bllok lajmesh me zhvillimet kryesore nga kronika e zezë, ku ndër të tjera veçojmë:
SPAK ka kërkuar dëshminë e rreth 30 personave në dosjen ndaj Ilir Meta, ndërsa procesi gjyqësor vijon në GJKKO mes tensioneve dhe përplasjeve në sallë, përfshirë edhe debatet me prokurorin.
Në një tjetër çështje, SPAK ka kërkuar dënimin e kryebashkiakes së Roskovecit, Majlinda Bufi, e akuzuar për përdorim të detyrës në funksion të veprimtarisë politike dhe zgjedhore, ndërsa vendimi pritet nga gjykata.
Ndërkohë, hetime të tjera po vijojnë në disa qarqe të vendit: në Sarandë janë caktuar 12 masa sigurie për ndërtime pa leje dhe shpërdorim detyre, ndërsa në Dibër 14 masa sigurie lidhen me një skemë të dyshuar të tjetërsimit të pronave, ku disa persona janë shpallur në kërkim.
Në Devoll, SPAK dhe BKH kanë ushtruar kontrolle ndaj ish-zyrtarëve të AMP dhe Policisë Bashkiake për dyshime për shpërdorim detyre, ndërsa në Tiranë është arrestuar një 43-vjeçar për armëmbajtje pa leje. Po ashtu, në Lezhë është ndaluar një 40-vjeçar i dyshuar për përkrahje të autorëve të një vrasjeje të dyfishtë.
Paralelisht, vijojnë edhe hetimet për pasuri të sekuestruara që lidhen me rrjete të dyshuara kriminale dhe për bashkëpunim ndërkombëtar në luftën kundër trafikut të drogës.
Lini një Përgjigje