Shkruar nga Pamfleti
Një plagosje me armë zjarri ka ndodhur ditën e sotme në fshatin Vermosh të Malësisë së Madhe. Një 55-vjeçar i identifikuar si Gjergj Marku, ka qëlluar me armë zjarri një 30 vjeçar të identifikuar si Mati Pemaj, pas një konflikti për motive të dobëta.
Sipas informacioneve 55-vjeçari gjithashtu ka kërcënuar një tjetër shtetas i cili u afrua t’i jepte ndihmën e parë 30-vjeçarit të plagosur. Autori pas ngjarjes ka tentuar që të arratiset por është arrestuar nga forcat e policisë.
Gjithashtu mësohet se n[ gjendje të lirë është proceduar dhe gruaja e 55-vjeçarit, ndërkohë që grupi hetimor po punon për zbardhjen e plotë të ngjarjes.
‘Plagosi me armë zjarri një shtetas dhe tentoi të largohej nga vendi i ngjarjes, falë reagimit në kohë të shërbimeve të Policisë, kapet dhe vihet në pranga 55-vjeçari.
Shërbimet e Policisë, pas njoftimit se në vendin e quajtur “Qafa e Bardelecit”, në fshatin Vermosh, Malësi e Madhe, ishte plagosur me armë zjarri një shtetas, kanë shkuar menjëherë në këtë adresë. Nga veprimet e para hetimore rezultoi se pas një konflikti për motive të dobëta, shtetasi Gj. M. kishte plagosur me armë zjarri pistoletë, në dorë, shtetasin M. P., 30 vjeç, i cili ndodhet jashtë rrezikut për jetën. Gjithashtu, shtetasi Gj. M. ka dëmtuar automjetin e shtetasit D. Q. dhe e ka kanosur atë, pasi i ka ofruar ndihmë shtetasit të plagosur.
Falë veprimeve të shpejta operacionale, pas disa minutash ndjekjeje, shërbimet e Policisë kanë kapur dhe vënë në pranga autorin e dyshuar, shtetasin Gj. M., 55 vjeç.
Në vijim të veprimeve, nisi procedimi në gjendje të lirë për bashkëshorten e shtetasit Gj. M., shtetasen E. M., pasi ka qenë prezente gjatë konfliktit dhe ka kanosur shtetasin D. Q. Materialet procedurale do t’i kalojnë Prokurorisë, për veprime të mëtejshme.’, njofton policia.
