Kronike 3 Mars 2024, 11:40

Vendosi tritol në banesën e Ilir Koçiljas, identifikohet autori; Policia: Menjëherë pas ngjarjes ka dalë jashtë vendit (Video)

Shkruar nga Pamfleti

Vendosi tritol në banesën e Ilir Koçiljas, identifikohet

Policia ka identifikuar personin që vendosi tritol pak ditë më parë në banesën e Ilir Koçiljas në Durrës. Ky i fundit u arrestua më herët për vrasjen e fqinjit të tij.

Policia bën me dije se tritoli u vendos nga shtetasi Florim Llana, i cili pas krimit ka dalë jashtë territorit. Për këtë arsye ai është shpallur në kërkim ndërkombëtar. Llana rezulton i dënuar më parë për ngjarje të tjera kriminale të ndodhura në qytetin e Durrësit.

Njoftimi i policisë

Zbardhet ngjarja e ndodhur më datë 26.02.2024, në lagjen nr. 3, ku një shtetas i paidentifikuar vendosi lëndë eksplozive në banesën e një shtetasi.

Falë veprimeve të shpejta dhe profesionale hetimore, u bë i mundur identifikimi i shtetasit të dyshuar si autor i vendosjes së lëndës eksplozive.

Nga verifikimet e kryera rezulton se ky shtetas ka dalë nga Shqipëria, një ditë pas ngjarjes.

Strukturat hetimore te Komisariatit të Policisë Durrës, pas një pune të thelluar hetimore, në drejtimin e Prokurorisë së Durrësit, bazuar në këqyrjen e kamerave dhe në inteligjencën policore, kanë bërë të mundur idemtifikimin e autorit të vënies së lëndës eksplozive në banesën në pronësi të shtetasit L. K., ku si pasojë e shërthimit pati vetëm dëme materiale.

Nga veprimet e shpejta dhe profesionale hetimore, administrimi i provave në vendngjarje, si dhe këqyrja e kamerave, dyshohet se autori është larguar me një automjet të marrë me qira, drejt lagjes nr. 6.

Në vijim të veprimeve procedurale për këtë rast, u shpall në kërkim autori i dyshuar, shtetasi F. Ll., i dënuar më parë për ngjarje të tjera kriminale të ndodhura në qytetin e Durrësit.

Vijon puna intensive për kapjen e tij.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme, për veprën penale “Shkatërrimi i pronës me eksploziv”.