FLASH
Shkruar nga Pamfleti
Një dirigjent i përkryer, kompozitor dhe personalitet televiziv, i cili dinte të bashkonte profesionalizmin e lartë me një popullaritet të gjerë...
Trishtim në botën e muzikës italiane. Ka ndërruar jetë në moshën 69-vjeçare mjeshtri Peppe Vessicchio – dirigjenti, kompozitori dhe producenti që për dekada simbolizoi shpirtin e Festivalit të Sanremos. Ai ndërroi jetë pasditen e 8 nëntorit në spitalin San Camillo të Romës, ku ishte shtruar në kujdes intensiv për shkak të një komplikacioni të papritur. Spitali konfirmoi se shkaku i vdekjes ishte “një pneumoni intersticiale që u përkeqësua me shpejtësi”.
Familja ka njoftuar se funeralet do të zhvillohen në rreth të ngushtë, në mënyrë private.
Një ikonë e Sanremos dhe muzikës italiane
Peppe Vessicchio (emri i plotë Giuseppe Vessicchio) ishte ndër figurat më të dashura të skenës muzikore italiane. Një dirigjent i përkryer, kompozitor dhe personalitet televiziv, i cili dinte të bashkonte profesionalizmin e lartë me një popullaritet të gjerë. Publiku e adhuronte për prezencën e tij në Sanremo, por edhe për rolin e tij si mësues në talent-show-n “Amici di Maria De Filippi”.
I lindur në Napoli më 17 mars 1956, Vessicchio nisi karrierën duke bashkëpunuar me emra të mëdhenj si Gino Paoli, Edoardo Bennato dhe Peppino di Capri. Me Paolin firmosi hite të njohura si “Ti lascio una canzone” dhe “Cosa farò da grande”.
Fitoret në Sanremo dhe bashkëpunimet e mëdha
Që nga viti 1990, Vessicchio u bë pjesë e pandarë e Festivalit të Sanremos, ku fitoi katër herë si dirigjent:
-në vitin 2000 me Avion Travel (“Sentimento”),
-në 2003 me Alexia (“Per dire di no”),
-në 2010 me Valerio Scanu (“Per tutte le volte che”),
-dhe në 2011 me Roberto Vecchioni (“Chiamami ancora amore”).
Përveç këtyre, mori dhjetëra çmime si “arranzhuesi më i mirë”, duke dëshmuar talentin dhe ndjeshmërinë e tij të rrallë muzikore.
Vessicchio bashkëpunoi me shumë artistë të mëdhenj italianë dhe ndërkombëtarë – nga Andrea Bocelli e Zucchero, te Ornella Vanoni, Ron, Biagio Antonacci dhe grupi Elio e le Storie Tese. Ai dirigjoi edhe në skena prestigjioze, përfshirë Kremlin-in në një koncert-homazh për John Lennon, dhe drejtoi projektin gjigant “Rockin’1000”, grupin më të madh rock në botë.
Në vitet e fundit, punonte për një tur teatror të titulluar “Ecco che incontro l’anima” (“Ja ku takohem me shpirtin”), së bashku me kantautorin Ron.
Filozofia e tij muzikore: Çdo njeri është si një tel që vibron
“Çdo person është si një tel që vibron. Vetëm kur gjejmë pasionin tonë të vërtetë, fillojmë të ‘bëjmë muzikë’”, thoshte shpesh Vessicchio. Për të, edukimi muzikor ishte më shumë se teknikë – ishte kërkimi i harmonisë së brendshme.
Ai besonte në konceptin e “harmonisë natyrore” si mënyrë për të kuptuar botën: “Harmonia është gjendja optimale e elementeve të një tërësie – në muzikë, por edhe në jetë”. Për Vessicchion, bukuria ishte një ekuilibër mes tingullit dhe heshtjes: “Heshtja është pëlhura ku futet tingulli”, përsëriste shpesh ai.
Në vitin 2024, Orkestra e Teatrit La Scala interpretoi një vepër të tij, “Tarantina”, si njohje për kontributin e tij unik në muzikën italiane. “Të dëgjosh muzikën time në La Scala ishte si të kthehesha në shtëpi pas një udhëtimi të gjatë”, pati rrëfyer ai me modesti karakteristike.
Lini një Përgjigje