FLASH
Shkruar nga Pamfleti
Komisioni i Ankimimeve dhe Sanksioneve (KAS) ka rrëzuar sot kërkesën e paraqitur nga Partia Demokratike për përjashtimin e anëtarit Ilir Rusmali nga shqyrtimi i ankimimeve të kësaj force politike për rezultatin e zgjedhjeve në disa qarqe.
Kërkesa, e depozituar me shkrim nga përfaqësuesi ligjor i PD-së, Marash Logu, ngrinte dyshime mbi paanshmërinë e Rusmalit, duke theksuar lidhjen e tij me institucionin e Presidencës, si këshilltar. Logu shtoi gjithashtu se anëtari në fjalë ka shfaqur sjellje të papërshtatshme gjatë seancave, përfshirë ofendime personale ndaj përfaqësuesve të PD-së.
Në shkresën zyrtare drejtuar KAS, theksohet: “Anëtari Rusmali, në pamundësi për të kontrolluar shpërthimet emocionale dhe bindjet e tij të brendshme ndaj pales ankuese, Partisë Demokratike dhe lidershipit të saj, degradon në sharje dhe ofendime personale ndaj përfaqësuesve ligjor të subjektit zgjedhor “Partia Demokratike – Aleanca për Shqipërinë Madhështore”.
Sjellje, veprime dhe shprehje, të cilat jo vetëm cenojnë solemnitetin e shqyrtimit administrativ, por dëshmojnë për probleme të thella karakteriale, siç mund të jetë mllefi i akumuluar ndër vite i këtij anëtari ndaj Partisë Demokratike dhe lidershipit të saj, që e bën të humbasë objektivitetin dhe të mos ruajë etikën minimale të komunikimit njerëzor/institucional, që duhet të karakterizojë anëtarët e një trupe kolegjiale të një organi publik”.
Pavarësisht pretendimeve të PD-së, KAS vendosi të mos e pranojë kërkesën, duke lënë Rusmalin pjesë të trupës që po shqyrton ankimimet e opozitës pas zgjedhjeve të 2025.
Lini një Përgjigje