FLASH
Shkruar nga Pamfleti
Kryeministri i Kosovës, Albin Kurti do të vizitojë sot Tiranën ku do të zhvillojë takim me homoloun e tij Edi Rama dhe me kryetaren e Kuvendit, Lindita Nikolla.
Me këtë të fundit, Kurti pritet të takohet në Kuvendin e Shqipërisë, duke filluar nga ora 11:30.
Sipas informacioneve, në takimin Rama-Kurti, në fokus do të jetë marrëveshja e pafirmosur në Ohër mes Kosovës dhe Serbisë.
Në marrëveshjen e arritur në Ohër, palët kanë rënë dakord të zbatojnë marrëveshjet e arritura mes tyre, si dhe Kosova të nisë përgatitjet për të siguruar një nivel të mirëfilltë të vetëmenaxhimit të komunitetit serb, një nen që shihet si referencë për Asociacionin e komunave me shumicë serbe.
Një tjetër dakordësi është arritur edhe për personat e zhdukur gjatë luftës, ndërsa për monitorimin e të gjitha pikave të aneksit të marrëveshjes do të ngrihet një Komitet i Përbashkët Monitorues që do të kryesohet nga BE-ja.
Edhe pse nuk është firmosur një marrëveshje, palët pas 12 orësh bisedime në Ohër, kanë arritur marrëveshje për të zbatuar propozimin e BE për normalizimin e marrëdhënieve.
Kosova dhe Serbia më 27 shkurt u pajtuan për marrëveshjen drejt normalizimit, dhe me 18 mars, pati dakordësi për Aneksin e zbatimit.
Duke e quajtur marrëveshjen si më të mirën deri më tani, Kurti tha se Serbia do të frenonte implementimin e saj, edhe pse kishte pranuar njohjen de facto të Kosovës.
Partitë opozitare e kritikuan ashpër Kurtin për zmbrapsje nga qëndrimet e tij, veçanërisht mbi asociacionin dhe për heqjen dorë nga njohja reciproke.
Marrëveshja prej 11 pikash nuk e përmend në mënyrë specifike njohjen e ndërsjellë, por ajo kërkon nga të dyja vendet të pranojnë dokumentet dhe simbolet e njëri tjetrit, përfshirë pasaportat diplomat dhe targat.
Takimi i fundit i Kurtit në Tiranë ka qenë me 13 Shtator të 2022 , ku ai mbërriti me urgjencë në kryeqytet pasditen e të martës, për një takim me kryeministrin Edi Rama.
Ky i fundit e priti kryeministin e Kosovës në vilën qeveritare 30 në një takim kokë më kokë dhe të paparalajmëruar për mediat nga stafet përkatëse të shefave të dy qeverive.
Lini një Përgjigje