FLASH
Shkruar nga Pamfleti
Kryeministrja italiane Giorgia Meloni mori pjesë në darkën zyrtare të liderëve të vendeve anëtare të NATO-s, të organizuar në Ankara në kuadër të samitit të Aleancës.
Sipas mediave italiane, Meloni u ul në të njëjtën tryezë me presidentin turk Recep Tayyip Erdoğan dhe presidentin amerikan Donald Trump. Në të njëjtën tryezë ishin gjithashtu kancelari gjerman Friedrich Merz, presidenti francez Emmanuel Macron dhe kryeministri britanik Keir Starmer.
Pas përfundimit të darkës, duke u kthyer në hotel, Meloni u pyet nga gazetarët për marrëdhëniet me Donald Trump, pas deklaratave të tensionuara të ditëve të fundit.
"Marrëdhënie të përzemërta", u përgjigj shkurt kryeministrja italiane.
Kur u pyet nëse kishte pasur një sqarim me presidentin amerikan pas shkëmbimit të akuzave të fundit, Meloni u mjaftua të thoshte: "Ju jam përgjigjur tashmë", duke mos dhënë detaje të tjera.
Edhe ministri i Jashtëm italian, Antonio Tajani, u ndal te marrëdhëniet mes Romës dhe Uashingtonit, duke theksuar se ato mbeten të forta.
"Përtej batutave dhe deklaratave, marrëdhëniet e Italisë me Shtetet e Bashkuara janë solide", deklaroi Tajani pas darkës së ministrave të Jashtëm të NATO-s.
Ai shtoi se raportet me sekretarin amerikan të Shtetit, Marco Rubio, kanë qenë "gjithmonë të shkëlqyera", njësoj si ato me ambasadorin amerikan në Romë.
"Nuk ka pasur kurrë përplasje. Ne jemi ne, ata janë ata, por jemi pjesë e së njëjtës aleancë politike, e cila është themelore. Marrëdhëniet janë solide dhe të përzemërta. Ne nuk duam polemika; duhet të flasim me amerikanët. Ne kemi mbetur gjithmonë të njëjtët", u shpreh Tajani.
Lini një Përgjigje