Politike 2 Mars 2023, 11:17

Rama-opozitës: Hidhuni përpjetë sa të doni, nderin e përballjes s’do e keni me mua!

Shkruar nga Pamfleti
Rama-opozitës: Hidhuni përpjetë sa të doni, nderin e
Edi Rama në Kuvend

Kryeministri Edi Rama ia ka bërë të qartë opozitës se nuk do e kenë ‘nderin’ e përballjes me të. Rama tha se mund të vazhdojnë me revolucionet imagjinare, por ai nuk do të bëhet palë. Kryeministri shtoi se ka pranuar të marrë pjesë në mocion për debat vetëm për për respekt të zgjedhësve dhe deputetëve të shumicës.

Fronti i prokurorisë i pranishëm në sallë po zhvillon me hov revolucionar një tjetër proces këtu në Shqipëri. Se kush janë dhe pse e bëjnë këtë vetëgjyqësi të harbuar, besoj se s’ka shumë nevojë për shpjegime. Dihen e shquhen për nisma të kësaj natyre dhe as nuk i ngatërron dot me dikë tjetër. Janë po ata që i kanë bërë të tëra të zezat për të cilat na akuzojnë natë e ditë që kur ranë në opozitë. S’kam ardhur sot e nuk do të vij më për ta. Do të vij sa herë të jetë nevoja për respekt të zgjedhësve dhe deputetëve të shumicës që sot nuk mund t’i lija vetëm në këtë mocion absurd për debat.

E kam thënë që para se të niste kjo zallamahi, që në të hyrë të vitit të ri që s’do ta furnizoj më me energjinë time të zjarrit pa ndalim. Nuk kam dëshirë të armatosem me fjalorin e ulët të kësaj politike. Fatkeqësisht janë përfshirë me zell e zjarr në këtë palo luftë dhe jam bërë padashje dhe unë pjesë e asaj mase të errët. Mjaft më. Ka kaq shumë gjëra për të bërë. Flisni, bërtisni, ulërini, akuzoni, shpifni, kërcënoni, shani, ofendoni, sajoni, fabrikoni, protestoni, hidhuni përpjetë sa të doni por nderin e përballjes me mua bam e bum, njëri gozhdës tjetri patkoit, s’keni për ta pasur. Thojini të tjerëve sa të doni që jam trembur, po të doni mos u shkulni nga revolucionet imagjinare, por mua s’do më keni më palë. Ju jeni në rregull, keni hyrë në vitin e 10-të të rrugës që më keni rrëzuar disa herë”, tha Rama.

rama kuvend