Shkruar nga Pamfleti
Ambasadori finlandez në Prishtinë, Matii Nissinen, thotë se zbatimi i Marrëveshjes së dakorduar të Ohrit përshpejton procesin e anëtarësimit të Kosovës dhe Serbisë në Bashkimin Evropian.
Në një intervistë për KosovaPress, Nissinen thekson se zbatimi i marrëveshjes është i detyrueshëm për të dyja palët.
Ambasadori Nissinen thotë se Kosova i përket organizatave evropiane dhe euroatlantike, derisa shpreh mbështetjen për anëtarësim në Këshillin e Evropës dhe në Bashkimin Evropian. E prioritet i Finlandës për Kosovën, sipas tij, mbetet edhe rritja ekonomike, e cila, siç thotë ai, më së miri arrihet përmes bashkëpunimit ndërmjet dy vendeve.
Diplomati finlandez vëmendje të veçantë i jep edhe mjedisit të sigurisë në botë pas luftës pushtuese të Rusisë në Ukrainë, për çka thekson se është jetike që vendet si Kosova dhe Finlanda të vazhdojnë të mbështesin vlerat demokratike në botë.
Edhe presidenti i Francës, Emmanuel Macron e përshëndeti marrëveshjen e arritur mes Kosovës e Serbisë së takimin e Ohrit duke e cilësuar si “një hap domethënës përpara”.
Nga samiti i Bashkimit Europian, ku u diskutua dhe dialogu Prishtinë-Beograd, i ndërmjetësuar prej vitesh nga BE-ja, presidenti francez kujtoi pjesëmarrjen aktive në këtë proces të vendit të tij dhe të Gjermanisë.
