Kosova21 Prill 2024, 22:42

“S’ka vullnet për shkarkimin e kryetarëve në veri”, Kurti thirrje BE-së: E plotësuam kushtin, hiqni masat ndaj Kosovës!

Shkruar nga Pamfleti

“S’ka vullnet për shkarkimin e kryetarëve në

Kryeministri i Kosovës, Albin Kurti, ka deklaruar se me procesin e votimit në veri u tregua se s'ka vullnet për t'i shkarkuar kryetarët aktualë, dhe i bëri thirrje Bashkimit Evropian që t'i heqë masat sanksionuese sa më parë.

Me anë të një postimi në rrjetin social ‘Facebook’, Kurti tha se autoritetet e Beogradit kanë ushtruar presion ndaj qytetarëve serbë në veri, pasi sipas tij, Serbia e ka parë se mund të mbledhë 20, por 50 për qind të votave të nevojshme për t’i shkarkuar kryetarët.

Qytetarët serbë në katër komunat në veri - Mitrovicë e Veriut, Zubin Potok, Zveçan dhe Leposaviq - sot patën mundësinë të shkarkojnë kryetarët aktual në një proces demokratik dhe të ligjshëm zgjedhor. Rezultatet e votimit të sotëm tregojnë që nuk ka vullnet për t’i shkarkuar kryetarët aktual. 20% të votave të mbledhura nga Lista Serbe për peticionin për të inicuar këtë proces, nuk rezultuan më shumë se aq. Serbia e ka parë që mund t’i mbledh 20% por jo edhe 50%. Qeveria e Republikës së Kosovës është ndjeshme ndaj rrethanave në katër komunat në veri të Kosovës, sidomos ndaj trysnisë së madhe të ushtruar nga autoritetet e Beogradit ndaj qytetarëve serbë të Kosovës në këto katër komuna”, shkruan Kurti.

Më tej, kreu i qeverisë së Kosovës, tha se mundësia e shkarkimit të kryetarëve në komunat veriore dhe mbajtja e zgjedhjeve ishte kriter kyç për heqjen e masave. Ai ka ftuar kryetarin e Zveçanit, Ilir Peci dhe atë të Zubin-Potokut, Izmir Zeqirin, të shkojnë në objektet e komunave për të ushtruar detyrën.

“Mundësimi i shkarkimit të kryetarëve aktual dhe mbajtja e zgjedhjeve për shkarkim ishin kriter kyç për largimin e masave ndaj Kosovës nga ana e Bashkimit Evropian. Këto masa të padrejta, pas votimit të sotëm, duhet larguar sa më parë. Ata që nuk i kanë dashur këta katër kryetarë komunash në veri, sonte, me keqardhje duhet t’ua urojnë atyre pozitat. E kryetarët e Zveçanit dhe Zubin Potokut, Ilir Peci dhe Izmir Zeqiri, bëjnë mirë që më në fund të shkojnë në zyret e tyre dhe ta ushtrojnë në mënyrë të papenguar detyrën në objektet zyrtare të komunave të Republikës së Kosovës”, përfundon Kurti.

kurti