FLASH
Shkruar nga Pamfleti
Asambleja e Përgjithshme Zgjedhore e Federatës Shqiptare të Futbollit zhvillohet të hënën, më 16 shkurt, në orën 10:00, në “Shtëpinë e Futbollit” në Tiranë. Delegatët do të zgjedhin presidentin për katër vitet e ardhshme dhe dhjetë anëtarët e Komitetit Ekzekutiv.
Për postin e presidentit është regjistruar një kandidaturë e vetme. Armand Duka ka marrë mbështetjen e 33 anëtarëve të federatës. Ai drejton FSHF-në që nga viti 2002 dhe, me këtë proces, pritet të nisë mandatin e shtatë në krye të institucionit.
Komisioni i Verifikimit ka miratuar 13 kandidatura për Komitetin Ekzekutiv. Në listë përfshihen Abdyl Kuriu, Anila Basha, Arben Dervishaj, Armando Cungu, Blendi Fevziu, Edmond Hasanbelli, Envi Hicka, Erind Resuli, Ervin Canollari, Geri Çipi, Gjergji Petro, Lutfi Nuriu dhe Pano Xhixho. Asambleja do të përzgjedhë dhjetë prej tyre.
Rendi i ditës përfshin edhe shqyrtimin e raportit të veprimtarisë mes dy asambleve, paraqitjen e bilancit dhe pasqyrave financiare, si dhe raportin e audituesve të pavarur dhe të jashtëm. Delegatët do të votojnë për miratimin e pasqyrave financiare të audituara për vitin 2025, buxhetin për vitet 2026 dhe 2027, si edhe për emërimin e audituesve me propozim të Komitetit Ekzekutiv.
Vendimmarrjet e kësaj mbledhjeje do të përcaktojnë drejtimin administrativ dhe financiar të federatës për vitet në vijim.
Lini një Përgjigje