Sport24 Janar 2024, 16:56

Me temperaturë apo çështje politike/ Pse nuk u zhvillua ndeshja e volejbollit mes Kosovës dhe Serbisë në Maqedoninë e Veriut?

Shkruar nga Pamfleti

Me temperaturë apo çështje politike/ Pse nuk u zhvillua ndeshja

Federata e Volejbollit e Kosovës kërkoi nga Konfederata Evropiane e Volejbollit (CEV) që të verifikojë pretendimet e Serbisë se nëntë lojtarë kishin temperaturë dhe për këtë arsye, kombëtarja e të rinjve nuk e zhvilloi ndeshjen me Kosovën. Këtë e tha për Radion Evropa e Lirë, Bahri Gjinovci, kryetari i Federatës së Volejbollit të Kosovës.

Skuadra e volejbollit të Serbisë për meshkuj nën 18-vjeç nuk luajti një ndeshje kundër Kosovës më 21 janar në Strumicë të Maqedonisë së Veriut, në kuadër të kualifikueseve për Kampionatin Evropian 2024. Ndeshja u regjistrua me rezultatin zyrtar 3:0 në favor të Kosovës dhe kadetët e Serbisë e mbyllën garën në vendin e gjashtë - gjë që i eliminoi nga ndeshjet e tjera të raundit kualifikues. Shpjegimi zyrtar ishte se nëntë lojtarë kishin temperaturë dhe kjo i pengoi të dilnin në fushë.

Kjo mund të ndodhë, por ne nuk e besojmë këtë arsyetim. Kemi kërkuar nga Konfederata Evropiane e Volejbollit të konfirmojë nëse janë dorëzuar raportet mjekësore, se vërtetë ky ka qenë rasti apo nuk kanë dashur të luajnë kundër Kosovës”, tha Gjinovci.

Serbia nuk e njeh Kosovën si shtet. Nën ndërmjetësimin e Bashkimit Evropian, dy vendet janë në negociata për normalizimin e marrëdhënieve, të cilat duhet të rezultojnë me një marrëveshje ligjërisht të detyrueshme. Federata e Volejbollit e Kosovës tha më 22 janar se më shumë do t’i gëzohej suksesit të arritur në fushë sesa rezultatit të marrë “në tavolinë”.

Sporti duhet të krijojë ura bashkimi, e Serbia, në këtë rast, ka dëshmuar përmes veprimeve të kësaj natyre se akoma nuk e ka këtë vullnet e gatishmëri”, u tha në deklaratën e saj.

Federata e Volejbollit e Serbisë i tha Radios Evropa e Lirë se ndeshja nuk u luajt, sepse nëntë lojtarë ishin me temperaturë të lartë. Sipas mjekut, i cili përcaktohet nga vendi pritës, edhe delegatët është dashur të konfirmojnë gjendjen shëndetësore të lojtarëve. Federata serbe nuk i komentoi pretendimet e Prishtinës, se vendimi për të mos luajtur ndeshjen me Kosovën mund të jetë politik.

Pasi përfundoi në vendin e gjashtë, ekipi kombëtar i Serbisë nuk e kaloi rundin tjetër kualifikues”, tha për Radion Evropa e Lirë, Konfederata Evropiane e Volejbollit.

Ndryshe nga Serbia, Kosova kaloi në fazën tjetër të kualifikueseve të Kampionatit Evropian 2024. Në turneun kualifikues në Strumicë, Serbia u desh të luftonte për vendin e pestë me Kosovën. Nikolla Jankoviç, gazetari i Sport Klubit në Serbi, i tha Radios Evropa e Lirë se kadetët serbë “janë përjashtuar nga i gjithë cikli kualifikues për moshën e tyre”.

Djemtë e humbën shansin për të garuar në Kampionatin e ardhshëm Evropian dhe duke pasur parasysh se ai është kualifikues për Kampionatin Botëror, e humbën shansin për të garuar edhe në Kampionatin Botëror”, tha Jankoviç.

Kadetët serbë do ta kenë shansin e ardhshëm për të garuar kur të jenë dy ose tre vjet më të vjetër”, shtoi ai.

Konfederata Evropiane e Volejbollit dhe Shoqata Ballkanike e Volejbollit nuk iu përgjigjën pyetjeve të REL-it nëse e kanë marrë kërkesën e Kosovës dhe nëse do të hetojnë pretendimet e Serbisë për lojtarët e sëmurë. Viteve të kaluara, në disa raste, politika mes Kosovës dhe Serbisë ishte vendimtare në garat sportive të skuadrave të tyre. Dy lojtarë dhe një trajner me origjinë nga Serbia nuk morën pjesë në ndeshjen e Ligës Evropiane mes klubit sllovak, Slovan Bratislava, dhe klubit kosovar të futbollit, Ferronikeli, në korrik të vitit 2019.

Atëkohë, ata thanë se ishte vendim i tyre personal dhe se askush nga Serbia nuk i kishte thirrur. Ndeshja Mali i Zi-Kosovë, në kuadër të kualifikueseve për Kampionatin Evropian, u zhvillua në qershor të vitit 2019 pa selektorin e kombëtares malazeze, Lubisha Tumbakoviç, dhe dy lojtarë të lindur në Serbi, që luajnë edhe për ekipin e Sërvena Zvezdës të Beogradit.

Ata refuzuan të luanin kundër kombëtares së Kosovës,  gjë të cilën publiku e mori vesh pak orë para fillimit të ndeshjes. Në mars të vitit 2018, Beogradi anuloi ndeshjen e planifikuar mes ekipeve të hendbollit për femra të Serbisë dhe Kosovës. Si arsye, autoritetet serbe përmendën rrezikun e konflikteve të mundshme mes tifozëve serbë dhe policisë.

Paraprakisht, të djathtët publikuan video ku shiheshin tifozë serbë duke kënduar këngë nacionaliste në fshatin Kovillovo, jo shumë larg Beogradit, ku do të luhej ndeshja. Pas këtij incidenti, Federata Evropiane e Hendbollit pezulloi hendbollistet e Serbisë nga kualifikimi në Kampionatin Botëror, njoftoi organizata.

Në disa raste, sportistët kosovarë nuk u lejuan as të hyjnë në territorin e Serbisë. Një rast i tillë ndodhi në tetor të vitit 2021, kur boksierët e Kosovës nuk mundën të merrnin pjesë në Kampionatin Botëror në Beograd.

Në atë kohë, autoritetet serbe nuk e lejuan ekipin 3-anëtarësh të Kosovës të hynte në Serbi, duke i thënë se Serbia nuk e njeh Kosovën si shtet e, rrjedhimisht, as simbolet shtetërore të Kosovës.

Në maj të vitit 2018, edhe ekipi i karatesë i Kosovës, në dy raste, tentoi ta kalonte kufirin me Serbinë për të marrë pjesë në Kampionatin Evropian të Karatesë në Novi Sad. Garuesit nga Kosova u nisën më pas drejt Serbisë me veshje që nuk kishin simbole shtetërore.

Por, sportistët serbë u kthyen, po ashtu, nga kufiri i Kosovës. Në tetor të vitit 2019, futbollistët e Sërvena Zvezdës u kthyen nga pika kufitare e Jarinjës, në veri të Kosovës. Ata ishin nisur për në Zveçan, në veri të Kosovës, ku do të luhej ndeshja me klubin Trepça nga Mitrovica e Veriut për Kupën e Serbisë. Atëkohë, policia e Kosovës tha se ka marrë urdhër që të mos e lejojë hyrjen e tyre në Kosovë.

Sekretari i përgjithshëm i Federatës së Futbollit të Kosovës, Eroll Salihu, tha asokohe për Radion Evropa e Lirë se zhvillimi i ndeshjes zyrtare të klubeve serbe në territorin e Kosovës, është provokim i pastër dhe shkelje e statutit të Federatës Evropiane dhe asaj Botërore të Futbollit (UEFA dhe FIFA). Po ashtu, basketbollistët e Partizanit të Serbisë nuk u lejuan të hyjnë në Kosovë në dhjetor të vitit 2018. Siç raportuan atëkohë zyrtarë të këtij klubi, policët u kanë thënë se duhet të kërkojnë leje për të hyrë në Kosovë./REL

federata e volejbollit e kosovës volejbollistët e serbisë