FLASH
Shkruar nga Pamfleti
Përfaqësuesja e Kosovës ishte shumë pranë një kualifikimi historik në Kupën e Botës 2026, por humbja në shtëpi ndaj Turqisë i dha fund këtij objektivi që dukej i arritshëm. Disfata shuajti shpresat e “Dardanëve” për një pjesëmarrje të parë në një Botëror, duke lënë pas zhgënjim dhe pikëpyetje për të ardhmen.
Pavarësisht potencialit për të tentuar sërish në të ardhmen, përbërja aktuale e skuadrës pritet të pësojë ndryshime të rëndësishme. Një pjesë e mirë e lojtarëve që kanë qenë shtyllë e ekipit janë mbi moshën 30-vjeçare dhe mund të mos jenë në të njëjtin nivel në ciklin e ardhshëm kualifikues.
Në repartin e mbrojtjes, emra si Amir Rrahmani (32), Florent Hadërgjonaj (31), Fidan Aliti (32), Mërgim Vojvoda (31) dhe Leart Paqarada (31) përbëjnë një bazë me përvojë, por që në 3-4 vitet e ardhshme pritet të kenë një rol më të kufizuar. Për disa prej tyre, kjo mund të ketë qenë mundësia e fundit për një kualifikim në Kupën e Botës.
Edhe në mesfushë dhe sulm situata paraqitet e ngjashme. Valon Berisha (33) është pranë fundit të angazhimeve në kualifikueset e Botërorit me Kosovën, ndërsa Vedat Muriqi (31), një nga figurat kryesore në sulm, mund të mos jetë në kulmin e formës së tij kur të zhvillohen kualifikueset për Botërorin 2030.
Humbja ndaj Turqisë jo vetëm që i dha fund ëndrrës për 2026-ën, por nxori në pah nevojën për rinovim të skuadrës dhe përgatitje të një brezi të ri lojtarësh. Mbetet për t’u parë se si do të ndërtohet ekipi në vitet në vijim dhe nëse Kosova do të arrijë të ruajë konkurrueshmërinë në skenën ndërkombëtare.
Lini një Përgjigje