FLASH
Shkruar nga Pamfleti
Mbrëmjen e sotme, vëmendja e futbollit europian dhe botëror do të përqendrohet në “Santiago Bernabeu”, ku Real Madrid përballet me Bayern Munich në një nga sfidat më të rëndësishme të Champions League.
Skuadra spanjolle hyn në këtë përballje me objektivin për të lënë pas humbjen ndaj Mallorcës dhe për të siguruar një vend në gjysmëfinale. Në total, dy ekipet sjellin në fushë 21 trofe të Champions League, me Real Madrid që kryeson historikisht me 15 tituj, kundrejt 6 të Bayernit.
Statistikat janë në favor të madrilenëve, për të cilët kjo është paraqitja e 22-të në çerekfinale, ndërsa kanë arritur 17 herë në gjysmëfinale nga kjo fazë. Nën drejtimin e Álvaro Arbeloa, Reali ka fituar të gjitha ndeshjet me eliminim direkt këtë sezon, ndërsa në shtëpi mbetet një kundërshtar i fortë, me pesë fitore në gjashtë ndeshje europiane. Edhe bilanci ndaj Bayernit është pozitiv, me vetëm një humbje në tetë përballjet e fundit dhe dominim në “Bernabeu”.
Nga ana tjetër, Bayern Munich paraqitet me formë të mirë dhe moral të lartë. Gjermanët mbajnë rekordin për më shumë paraqitje në çerekfinale (24), edhe pse kanë regjistruar edhe disa eliminime në këtë fazë. Fitorja 3-2 ndaj Freiburg ka zgjatur serinë e tyre pa humbje në 12 ndeshje në të gjitha kompeticionet. Edhe në transfertë, bavarezët kanë qenë të qëndrueshëm, me vetëm një humbje në tetë ndeshjet e fundit jashtë fushe në Champions.
Në planin individual, vëmendja përqendrohet te yjet ofensivë. Kylian Mbappe po zhvillon një sezon të shkëlqyer në Europë, me një mesatare goli çdo 56 minuta, ndërsa për Bayern spikat Lennart Karl, i cili ka kontribuar drejtpërdrejt në katër gola në tre ndeshjet e fundit.
Sa i përket mungesave, Real Madrid nuk do të ketë në dispozicion Thibaut Courtois dhe Rodrygo, ndërsa te Bayern mbetet në dyshim aktivizimi i Harry Kane për shkak të një dëmtimi me kombëtaren angleze.
Sfida në “Bernabeu” pritet të ofrojë një tjetër spektakël mes dy prej klubeve më të mëdha të futbollit europian, në garën për një vend në gjysmëfinale.
Lini një Përgjigje