“Mungon transparenca dhe qartësia”, Dashnor Sula: Projekti i Portit të Durrësit kërcënon integrimin në BE - Politike
Politike31 Gusht 2022, 17:57

“Mungon transparenca dhe qartësia”, Dashnor Sula: Projekti i Portit të Durrësit kërcënon integrimin në BE

Shkruar nga Pamfleti
“Mungon transparenca dhe qartësia”, Dashnor Sula: Projekti i

Deputeti i Partisë Demokratike, Dashnor Sula deklaroi se projekti i Portit të Durrësit kërcënon integrimin në BE.

Në rrjetet sociale ai shkruan se  kjo qeveri përmes arrogancës së saj po shkel të gjitha marrëveshjet ndërkombëtare. Sipas tij, projekti në Portin e Durrësit ka nevojë për transparencë dhe garë reale.

Postimi i Dashnor Sulës

Projekti i Portit të Durrësit kërcënon integrimin në BE.

Ende pa nisur mirë procesi i negociatave me Bashkimin Evropian për tu bërë pjesë e unionit, qeveria po e rrezikon seriozisht këtë proces. Arroganca e pashoqë e kësaj qeverie duke shkelur marrëveshjet e rëndësishme ndërkombëtare po devijojnë orientimin e Shqipërisë. Në çdo studim del që mbi 80% e Shqiptarëve duan që të jemi pjesë e Bashkimit Evropian, por qeveria që po drejton politikat shqiptare duket se po shkon kundrejt interesave të qytetarëve.

Në një reagim që Delegacioni i Bashkimit Evropianë ka bërë për një nga mediat shqiptare e thotë qartë se mungon transparenca dhe qartësia për projektin në Portin e Durrësit. Gjithashtu theksohet se nuk është zbatuar marrëveshja e Stabilizim Asocimit. Ndërkohë që bëjnë të qartë se mos zbatimi i kësaj marrëveshje ndikon drejtpërdrejtë në procesin e integrimit.

Citoj reagimin e BE: Për sa i përket rizhvillimit të portit të Durrësit, BE-ja ka nënvizuar vazhdimisht nevojën për qartësi dhe transparencë për marrëveshjen tregtare të lidhur mes Shqipërisë dhe Emirateve të Bashkuara Arabe, duke theksuar se, siç parashikohet në Marrëveshjen e Stabilizimit dhe Asociimit, kompanitë nga vendet e BE-së duhet të kenë mundësi të konkurrojnë mbi baza të drejta dhe të barabarta për kontratat publike. BE-ja do të vazhdojë të monitorojë nga afër zhvillimet e rëndësishme për Marrëveshjen e Stabilizimit dhe Asociimit dhe për procesin e anëtarësimit në BE, përfshirë në raportin vjetor të Komisionit, si dhe do t’i trajtojë ato me institucionet shqiptare në forumet përkatëse. Për sa u përket planeve të shpallura për zhvendosjen e aktiviteteve të portit të Durrësit, presim të marrim detaje të mëtejshme nga qeveria”, thuhet në përgjigjen e delegacionit evropian për median vendase.

Ndërkombëtarët janë shumë të qartë, projekti në Portin e Durrësit ka nevojë për transparencë dhe garë reale. Dhurimi i pronave publike tek të preferuarit e qeverisë është pazar jo për interes të qytetarëve por të vet kokave që janë në qeveri.

Politike Durrësi Porti Sula