FLASH
Shkruar nga Pamfleti
Një raport i ri nga Stockholm International Peace Research Institute (SIPRI) tregon se Gjermania është ngjitur në vendin e katërt në tregun global të armëve, duke kaluar Kinën në renditjen e eksportuesve më të mëdhenj.
Sipas të dhënave të institutit, gjatë periudhës 2021–2025 Gjermania përbën rreth 5.7% të eksporteve globale të armëve, pak më shumë se 5.6% që i atribuohet Kinës. Tregu vazhdon të dominohet nga Shtetet e Bashkuara, të cilat përfaqësojnë rreth 42% të eksporteve botërore. Pas tyre renditen Franca me 9.8% dhe Rusia me 6.8%.
SIPRI vlerëson se rritja e rolit të Gjermanisë lidhet me shtimin e kërkesës për pajisje mbrojtëse në Evropë pas pushtimit të plotë të Ukrainës nga Rusia në vitin 2022. Konflikti ka shtyrë shumë shtete evropiane të rrisin shpenzimet për mbrojtje dhe të forcojnë kapacitetet ushtarake.
Raporti thekson gjithashtu se Ukraina është bërë importuesja më e madhe e armëve në botë gjatë kësaj periudhe, duke përfaqësuar rreth 9.7% të importeve globale. Sipas analizës së institutit, kjo lidhet drejtpërdrejt me nevojat e vendit për armatim në luftën kundër Rusisë.
SIPRI raporton se pjesa më e madhe e armëve gjermane është blerë nga Ukraina, Egjipti dhe Izraeli. Këto kontrata kanë kontribuar në një rritje prej rreth 15% të eksporteve gjermane të armëve krahasuar me periudhën 2016–2020. Vetëm drejt Ukrainës është dërguar rreth një e katërta e eksporteve gjermane.
Industria ushtarake gjermane prodhon një gamë të gjerë pajisjesh, përfshirë mjete të blinduara, municione artilerie dhe sisteme të avancuara të mbrojtjes ajrore. Ndër pajisjet më të njohura janë tanku Leopard 2, mjeti luftarak KF41 Lynx, transportuesi i blinduar Boxer dhe sistemi i mbrojtjes ajrore IRIS-T SLM, të përdorura nga disa ushtri evropiane.
Lini një Përgjigje