Shkruar nga Pamfleti
Ish-presidenti i Shteteve të Bashkuara të Amerikës, Donald Trump është zyrtarisht nën akuzë.
Ish-presidenti i SHBA-së, Donald Trump akuzohet për pagesat që i janë bërë një ylli porno, Stormy Daniels, pak para zgjedhjeve presidenciale të vitit 2016, raporton CNN.
Një juri e madhe ka votuar për të paditur Donald Trump në Nju Jork.
Asnjë ish-president amerikan nuk është paditur penalisht më parë. Lajmi pritet të lëkundë garën për nominimin presidencial republikan në vitin 2024, në të cilin Trump kryeson shumicën e sondazheve.
Aktakuza tregon se ai është ish-presidenti i parë që akuzohet për një krim dhe e çon vendin në një territor të paeksploruar ligjor dhe politik, me një kandidat për president që tani përballet me arrestimin e tij. Kjo shënon një fitore për zyrën e Prokurorit të Qarkut të Manhatanit, Alvin Bragg, e cila ka hetuar një pagesë prej 130,000 dollarësh të bëra nga Michael Cohen, ish-avokati i Trump, gjatë fushatës presidenciale të vitit 2016.
Ndërkohë, të enjten u zbulua gjithashtu se prokurorët e Nju Jorkut po kërkonin të akuzonin Trump për një pagesë prej 150,000 dollarësh për një tjetër ish-modele të Playboy. Ekipi i Bragg ka marrë në pyetje dëshmitarët e jurisë së madhe në lidhje me paratë e Karen McDougal, e cila ishte "Playmate of Year" e revistës Playboy në 1998. Trump gjithmonë ka mohuar të ketë një lidhje me Daniels, emri i vërtetë i së cilës është Stephanie Clifford.
Akuzat dolën në dritë kur Trump ishte në detyrë, duke shkaktuar një hetim federal. Në vitin 2017, Cohen u deklarua fajtor për 8 akuza federale, duke përfshirë evazion fiskal, mashtrim dhe shkelje të financimit të fushatës. Ai i tha një gjykate në Manhattan se Trump e kishte urdhëruar atë të bënte pagesat.
Por hetimi u zhduk nga titujt kryesorë, pasi çështjet e tjera ligjore u fokusuan në biznesin e familjes së Trump dhe veprimet e tij rreth trazirave të 6 janarit 2001.
Por vëmendja prej hetimit nuk u largua kurrë. Çështja mori një vrull të ri në fillim të vitit 2023 kur Cohen u takua me hetuesit nga zyra e prokurorit të qarkut të Manhattanit dhe doli se një juri e madhe po mblidhte prova lidhur me rastin.
Trump po hetohet edhe për disa raste të tjera.
Ato përfshijnë hetimet për rolin e tij në trazirat e Kapitolit të SHBA-së të janarit 2021, përpjekjet e tij për të përmbysur humbjen e tij në shtetin e Xhorxhias në zgjedhjet e vitit 2020 dhe trajtimin e dokumenteve të klasifikuara pas largimit nga detyra.
Trump, i cili shërbeu si president nga 2017-2021 u fajësua dy herë nga Dhoma e Përfaqësuesve.
Ai u lirua nga Senati të dyja herët.
