FLASH
Shkruar nga Pamfleti
Ministri i Jashtëm i Italisë, Antonio Tajani, ka bërë thirrje për ndaljen e përshkallëzimit të konfliktit në Liban, duke kërkuar fundin e sulmeve mes Hezbollahut dhe Izraelit.
Gjatë një deklarate publike, kryediplomati italian theksoi se është e nevojshme të rikthehet qetësia në rajon dhe të shmangen veprimet ushtarake që rrezikojnë stabilitetin e mëtejshëm.
“Ne gjithashtu duhet të arrijmë të ndalojmë luftimet në Liban, në mënyrë që Hezbollahu të mos sulmojë më Izraelin dhe Izraeli të mos bombardojë më Bejrutin”, deklaroi Tajani.
Ai theksoi se Italia do të vazhdojë të luajë rolin e saj në rrugë diplomatike, me synimin për të kontribuar në uljen e tensioneve dhe ruajtjen e stabilitetit në Lindjen e Mesme.
“Ne do të vazhdojmë të bëjmë pjesën tonë në nivel diplomatik. Jemi gjithashtu të gatshëm të garantojmë një prani në Liban për të ndihmuar në forcimin dhe organizimin e forcave të armatosura të vendit”, tha ministri italian.
Sipas Tajanit, forcat e armatosura të Libanit duhet të kenë kontroll të plotë mbi të gjithë territorin e vendit. Ai theksoi se nuk mund të pranohet që pjesë të territorit libanez të mbeten jashtë autoritetit shtetëror dhe nën kontrollin e Hezbollahut.
Deklaratat e ministrit italian vijnë në një kohë kur shqetësimet ndërkombëtare për përshkallëzimin e konfliktit në rajon vijojnë të rriten, ndërsa diplomacia po kërkon rrugë për të shmangur një përballje më të gjerë.
Lini një Përgjigje