FLASH
Shkruar nga Pamfleti
Industria e mbrojtjes ishte në qendër të Samitit të NATO-s në Ankara, ku Aleanca prezantoi një paketë të re investimesh që synon forcimin e kapaciteteve ushtarake përballë sfidave të reja të sigurisë.
Sekretari i Përgjithshëm i NATO-s, Mark Rutte, njoftoi se Aleanca do të investojë rreth 40 miliardë dollarë gjatë pesë viteve të ardhshme në kuadër të programit "Drone Edge", i cili synon zhvillimin dhe integrimin e teknologjive të avancuara për luftën me dronë.
"Duhet të sigurohemi që ta shndërrojmë fuqinë tonë ekonomike në aftësi ushtarake, duke investuar në planet e mbrojtjes, dronë, raketa dhe sisteme interceptuese", deklaroi Mark Rutte, duke theksuar se objektivi është ndërtimi i kapaciteteve të reja të mbrojtjes të prodhuara brenda Aleancës, nën konceptin "Made in NATO".
Sipas Rutte, objektivi nuk është vetëm blerja e mjeteve ajrore pa pilot, por edhe ndërtimi i një sistemi të integruar që përfshin sensorë, sisteme zbulimi, luftë elektronike, interceptorë dhe kapacitete për neutralizimin e dronëve.
Në të njëjtën kohë, vendet anëtare të NATO-s janë angazhuar të pesëfishojnë deri në fund të vitit 2027 numrin e operatorëve të trajnuar të dronëve, duke reflektuar rëndësinë që këto sisteme kanë marrë në konfliktet e viteve të fundit, veçanërisht në luftën në Ukrainë.
Një tjetër vendim me peshë i shpallur në samit ishte nisja e procesit për zëvendësimin e flotës së avionëve radarikë E-3A AWACS, të cilët kanë qenë në shërbim të Aleancës për rreth pesë dekada.
NATO planifikon të blejë deri në 10 avionë Saab GlobalEye, të cilët do të ofrojnë kapacitete më të avancuara për mbikëqyrjen ajrore, tokësore dhe detare. Sipas informacioneve të bëra publike, dërgesat e para të këtyre avionëve pritet të nisin brenda vitit 2030.
Kryeministri suedez, Ulf Kristersson, e cilësoi marrëveshjen një sukses të rëndësishëm për industrinë e mbrojtjes së vendit të tij, duke e përshkruar atë si "një ditë fantastike për NATO-n, për Saab dhe për Suedinë".
Përveç këtyre investimeve, Rutte prezantoi edhe një sërë iniciativash të tjera shumëpalëshe, mes të cilave blerjen e pesë dronëve strategjikë MQ-4C Triton nga katër vende aleate, zgjerimin e kapaciteteve të transportit strategjik dhe furnizimit me karburant në ajër në bashkëpunim me Airbus, si dhe projekte të tjera industriale mes kompanive evropiane dhe atyre të Amerikës së Veriut.
Lini një Përgjigje