FLASH
Shkruar nga Pamfleti
Nuk kanë fund ngjarjet me plagosjen ose vrasjen e civilëve në SHBA nga autoritetet e shërbimit kufitar. Një person është plagosur rëndë ditën e sotme në SHBA, pasi u qëllua gjatë një incidenti ku ishte përfshirë Patrulla Kufitare e Shteteve të Bashkuara në Arizona.
Të shtënat ndodhën rreth orës 7:30 të mëngjesit sipas orës lokale pranë pikës kilometrike 15 të Rrugës West Arivaca. Vendndodhja e ngjarjes është pak më shumë se 50 milje në jugperëndim të qytetit të Tuscon. I plagosuri është dërguar me helikopter në spital në gjendje të rëndë.
Identiteti i personit të qëlluar nuk është bërë i ditur dhe rrethanat që çuan në të shtënat nuk janë ende të qarta. Megjithatë detaje të reja pritet të dalin në orët në vazhdim.
Departamenti i Sherifit të Qarkut Pima tha se iu përgjigj një të shtëne me armë zjarri ku përfshihej Patrulla Kufitare në Arivaca, një komunitet i paintegruar në pjesën jugore të shtetit rreth 10 milje në veri të kufirit me Meksikën.
“Po punojmë në koordinim me Zyrën e FBI-së në Phoenix-Tucson dhe Doganën dhe Mbrojtjen Kufitare të SHBA-së”, shkroi departamenti i sherifit në rrjetet sociale .
FBI-ja kërkoi ndihmën e Departamentit të Sherifit të Qarkut Pima për të udhëhequr hetimin e përdorimit të forcës që përfshin agjentin dhe po kryen një hetim paralel, tha departamenti në një njoftim për shtyp.
“Ne i kërkojmë komunitetit të mbetet i duruar dhe mirëkuptues ndërsa ky hetim ecën përpara. Do të shqyrtojëm plotësisht të gjitha aspektet e incidentit megjithatë, këto hetime janë komplekse dhe kërkojnë kohë”, deklaroi departamenti.
Ajo që vlen të theksohet, është fakti se të shtënat në Arizona vijnë pasi oficerët federalë të imigracionit qëlluan dhe vranë dy persona në Minneapolis këtë muaj: Alex Pretti, një infermier 37-vjeçar i kujdesit intensiv që trajtonte veteranët, dhe Renee Nicole Good, një poete 37-vjeçare dhe nënë e tre fëmijëve.
Vrasja e 37-vjeçarit pak ditë më parë ka shkaktuar trazira të mëdha në Minneapolis me qytetarët që kanë dalë në protesta dhe kërkojnë largimin e ICE-it.
Lini një Përgjigje