FLASH
Shkruar nga Pamfleti
Pronari i një shtëpie funeralesh në shtetin amerikan të Kolorados u dënua të premten me 40 vjet burg shtetëror, pasi për katër vjet kishte fshehur 189 trupa në gjendje dekompozimi në një ndërtesë dhe u kishte dorëzuar familjeve hir të rremë.
Gjatë seancës gjyqësore, anëtarë të familjeve të viktimave i thanë gjykatësit Erik Bentley se, që nga momenti kur mësuan të vërtetën, vuajnë nga makthe të përsëritura me trupa të kalbur dhe krimba. Ata e quajtën të pandehurin, John Halford, “përbindësh” dhe kërkuan dënimin maksimal prej 50 vitesh burg.
Gjykatësi Bentley deklaroi se Halford shkaktoi një dëm “të papërshkrueshëm dhe të pakuptueshëm”. “Besoj se secili prej nesh ka mirësi brenda vetes, por jetojmë në një botë që e vë në provë këtë mirësi çdo ditë. Zoti Halford, krimet tuaja e vënë rëndë në provë këtë mirësi,” tha ai.
Para shpalljes së dënimit, Halford kërkoi falje dhe deklaroi se do të pendohet për veprimet e tij për gjithë jetën. “Kisha shumë mundësi të ndaloja dhe të largohesha, por nuk e bëra. Gabimet e mia do të ndikojnë një brez të tërë. Gjithçka që bëra ishte e gabuar,” u shpreh ai.
Avokati mbrojtës kërkoi një dënim prej 30 vitesh, duke argumentuar se nuk bëhej fjalë për krim të dhunshëm dhe se klienti i tij nuk kishte precedent penal. Megjithatë, prokuroria theksoi se motivi kryesor ishte lakmia.
Ish-bashkëshortja e Halford, Carrie, bashkëpronare e shtëpisë funerale “Return to Nature Funeral Home”, pritet të dënohet më 24 prill dhe përballet me një dënim nga 25 deri në 35 vjet burg. Të dy kanë pranuar fajësinë në dhjetor për rreth 200 akuza për keqtrajtim trupash.
Sipas dokumenteve gjyqësore, gjatë viteve kur trupat mbaheshin të fshehur, çifti shpenzoi shuma të mëdha parash për blerjen e dy automjeteve luksoze me vlerë mbi 120 mijë dollarë, kriptomonedha prej 31 mijë dollarësh dhe bizhuteri nga marka të njohura si Gucci dhe Tiffany & Co.
“Është e qartë se bëhet fjalë për një krim të nxitur nga lakmia,” deklaroi prokurorja Shelby Crow. Ajo shtoi se çifti u kërkonte klientëve mbi 1.200 dollarë për kremacion, ndërsa paratë përfundonin në shpenzime luksi.
Lini një Përgjigje