FLASH
Shkruar nga Pamfleti
Policia italiane, në bashkëpunim edhe me autoritetet në Spanjë, ka arrestuar në Barcelonë djalin e ish-bankierit 54-vjeçar ukrainas, i cili u gjet i pajetë pasi ra nga një ndërtesë në Milano më 23 janar.
Mediat italiane bëjnë të ditur se 34-vjeçari Igor Adarich dyshohet për rrëmbimin e babait të tij, Alexandru Adarich.
Hetuesit dyshojnë se i biri e kishte bindur të atin të udhëtonte drejt Milanos me pretekstin e një takimi biznesi në një objekt në zonën Via Nerino, ku më pas dyshohet se është organizuar rrëmbimi. Hetuesit pretendojnë se ai ndihmoi në rrëmbimin e të atit për ta detyruar atë të transferonte 250,000 euro në kriptovaluta.
Sipas dosjes hetimore, 34-vjeçari akuzohet gjithashtu se ka shkaktuar rënien e të atit nga dritarja e apartamentit, pasi ai ishte i vetmi person në dhomë në atë kohë.
Autoritetet italiane kanë hedhur poshtë versionin e dhënë më parë nga i dyshuari para policisë së Barcelonës, sipas të cilit ata ishin sulmuar nga një grup personash të armatosur.
Sipas deklarimeve të të dyshuarit, ai dhe babai i tij kishin udhëtuar në Itali për një takim me një person të quajtur “Kirill”, por hetuesit nuk kanë gjetur prova për ekzistencën e një takimi të tillë.
Hetimet po vijojnë për zbardhjen e plotë të rrethanave të ngjarjes.
Si ndodhi ngjarja?
Një ngjarje e errët dhe plot mister tronditi Milanon më 29 Janar. Alexander Adarich, një bankier i njohur ukrainas 54-vjeçar, u gjet i vdekur pasi ra nga dritarja e katit të katërt të një ndërtese në via Nerino, në qendër të qytetit. Hetimet e policisë italiane u zhvilluan me dyshimin kryesor se nuk bëhet fjalë për vetëvrasje, por për vrasje të inskenuar.
Sipas hetuesve, Adarich mund të ketë qenë i vdekur kur u hodh nga dritarja e dhomës së një apartamenti që e kishte marrë me qira. Prokuroria e Milanos, e drejtuar nga prokurori Rosario Ferracane, ka hapur një hetim për vrasje dhe po përpiqet të rindërtojë lëvizjet e viktimës gjatë qëndrimit të tij të shkurtër në Itali.
Një detaj shumë i dyshimtë është dëshmia e postieres së pallatit. Ajo ka treguar se, menjëherë pas rënies së trupit, pa një burrë misterioz të shfaqej në dritare. Pak çaste më vonë, i njëjti person zbriti në oborr, u afrua dhe pyeti në anglisht: “Çfarë ka ndodhur?”, përpara se të largohej pa lënë gjurmë. Sipas hetuesve, në apartament ndodheshin edhe persona të tjerë pak minuta para rënies së Adarich, të cilët mund të jenë të përfshirë në krim.
Brenda apartamentit, policia ka gjetur dokumente të çuditshme: pasaporta dhe letra me kombësi të ndryshme, por me fotografinë dhe identitetin e Alexander Adarich. Ende nuk është e qartë nëse këto dokumente janë lënë qëllimisht për të krijuar konfuzion apo thjesht janë harruar nga autorët e krimit.
Adarich kishte mbërritur në Milano në mëngjes dhe kishte planifikuar të largohej po atë mbrëmje. Ai nuk kishte qenë kurrë më parë në qytet. Gjithashtu, apartamenti Airbnb nuk rezulton i prenotuar në emrin e tij, gjë që forcon dyshimet se ai ishte thirrur për një takim me persona të tjerë, ndoshta për të mbyllur një marrëveshje të rëndësishme. Pikërisht kjo marrëveshje e panjohur mund të përbëjë motivin e vrasjes. Hetuesit përjashtojnë, për momentin, përfshirjen në trafikun e drogës apo mashtrimeve të zakonshme financiare. Skenari duket shumë më kompleks, thuajse si një histori spiunazhi, duke pasur parasysh profilin e viktimës.
Alexander Adarich kishte një karrierë të gjatë dhe të diskutueshme në botën bankare. I lindur në Pavlohrad, pranë Dnipro-s, ai kishte dy diploma universitare dhe në vitin 2006 ishte futur në listën e 100 menaxherëve më të fuqishëm të Ukrainës. Nga viti 2012 deri në 2020 ishte pronar i Fidobank, një bankë tregtare ukrainase, e cila më vonë u mbyll nga autoritetet për shkak të dyshimeve për abuzime financiare dhe përvetësim fondesh në vlerë miliona euro.
Pas problemeve në Ukrainë, aktivitetet e tij financiare u zhvendosën në Qipro, Luksemburg dhe vende të tjera offshore, ndërsa emri i tij u lidh edhe me interesa ekonomike në zonën portuale të Odesës. Këto lëvizje ndodhën në vitet më të nxehta të luftës mes Ukrainës dhe Rusisë, duke shtuar edhe më shumë mister rreth figurës së tij.
Çfarë po bënte një njeri me një profil kaq të lartë në Milano, në një takim jozyrtar dhe në një apartament me qira ditore, është pyetja që mbetet ende pa përgjigje. Autopsia dhe hetimet e mëtejshme pritet të hedhin dritë mbi këtë ngjarje, që për momentin mbetet një nga misteret më të errëta kriminale të fundit në Itali.
Lini një Përgjigje