FLASH
Shkruar nga Pamfleti
Avokati i Popullit, Endrit Shabani, inspektoi sot Shtëpinë e të Moshuarve në Tiranë, ku u njoh nga afër me kushtet e jetesës së pensionistëve dhe problematikat me të cilat përballet ky sektor.
Pas inspektimit, Shabani propozoi që pasuritë e konfiskuara nga SPAK të vihen në dispozicion të shërbimeve sociale, duke u kthyer në shtëpi përkujdesjeje për të moshuarit.
Sipas të dhënave të bëra publike, Shqipëria ka aktualisht vetëm 6 qendra publike rezidenciale për të moshuarit, me kapacitet prej 330 vendesh, ndërsa mbi 60 mijë të moshuar jetojnë vetëm. Në këtë kontekst, nevojat për strehim dhe kujdes janë më të mëdha se kapacitetet ekzistuese.
“Vetëm këtë vit SPAK ka konfiskuar 2 milionë euro pasuri të krimit dhe korrupsionit. Institucionet publike mund t’i vënë këto prona dhe pasuri në shërbim të të moshuarve”, deklaroi Shabani.
Sipas tij, shteti zotëron 63 ndërtesa të konfiskuara nga krimi, përfshirë hotele, vila dhe apartamente, të cilat mund të përshtaten për shërbime sociale.
Gjatë inspektimit, Avokati i Popullit konstatoi gjithashtu mungesë të stafit mjekësor dhe infermieror, si dhe mungesë të mjediseve të specializuara për trajtimin e të moshuarve me probleme të rënda shëndetësore.
Çështja e kujdesit për të moshuarit mbetet një sfidë sociale, veçanërisht në kushtet kur kërkesat për strehim dhe përkujdesje janë më të larta se kapacitetet aktuale publike.
Ja u bene shtepi per pleq e cfate. Do i marre ne administrim privati horr i qeverisjes e do vjedhe sa te munde derisa te ngordhin (jo te vdesin) pleqte e shkrete. Ky fenomen eshte pare edhe ketu ne Britani ku prsoneli rreh pleqte e plakat e kane arritur deri sa tu jyejne buken edhe me nevoje. Morali ka shkuar ne fund te kembeve kudo.