FLASH
Shkruar nga Pamfleti
Milović dhe Mišurović diskutonin pagesat për ekzekutorët pas shpërthimit në qendër të Podgoricës
Edhe 1.500 euro mjaftonin që një objekt me vlerë miliona të hidhej në erë, ndërsa porositësit shpesh paguanin më shumë, deri në 2.500 euro për realizimin e sulmeve. Kjo rezulton nga komunikimet në aplikacionin e dekriptuar Sky mes policit në arrati Ljubo Milović dhe kolegut të tij Miloš Mišurović, të cilët, sipas Prokurorisë Speciale të Malit të Zi (SDT), kanë qenë të përfshirë në aktivitete të paligjshme.
Bisedat zhvillohen në fund të janarit 2021, në të njëjtën ditë kur një shpërthim shkatërroi lokalin “Štrudla” në qendër të Podgoricës, shkruan Vijesti.
“E dëgjova nga krevati si shpërtheu”, i shkruan Milović kolegut që përdorte pseudonimin “Globus”. Ai e pyet nëse eksplozivi ishte vendosur para derës apo brenda lokalit, ndërsa Mišurović përgjigjet se nuk është i sigurt. “Nuk e di, marrëveshja ishte brenda… të thyente xhamin, të vendoste fitilin prej 2 minutash dhe ta hidhte brenda”, shkruan ai.
Më pas ata diskutojnë nëse autorët janë kthyer në vendstrehim dhe nëse gjithçka ka shkuar sipas planit. Disa orë pas shpërthimit, konfirmohet se pajisja ishte hedhur brenda lokalit dhe se “kishte shkatërruar gjithçka”.
Biseda më tej kalon te pagesa për ekzekutorët. Mišurović thotë se ata kishin ofruar ta kryenin veprimin pa pagesë, por Milović kundërshton: “Për këtë nuk diskutojmë… nuk jemi të tillë”. Ai kërkon të dijë sa paguhet zakonisht për veprime të tilla, ndërsa përmend se më parë kishte paguar 2.000 euro për një rast të ngjashëm ku kërkesa fillestare ishte 1.500 euro. Në fund, ai shprehet se do të japë 2.500 euro, duke theksuar se nuk dëshiron që askush të mbetet i pakënaqur.
Në aktakuzën e SDT-së thuhet se Milović kishte përgatitur një mjet shpërthyes me 500 gram tritol, kapsulë detonatore dhe fitil me djegie të ngadaltë, të cilin ia kishte dorëzuar Mišurovićit dhe bashkëpunëtorëve të tjerë. Më 27 janar 2020, rreth orës 04:20, njëri prej tyre vendosi pajisjen shpërthyese pranë lokalit “Štrudla”, duke shkaktuar rrezik për jetën e qytetarëve dhe dëme materiale që tejkalojnë 240 mijë euro.
Sipas dokumenteve të hetimit, Milović i kishte dhënë Mišurovićit 4.000 euro, nga të cilat 2.500 euro u shpërndanë te personat që realizuan sulmin.
Në të njëjtën aktakuzë përmendet edhe një rast tjetër, ku të njëjtët persona dyshohet se organizuan djegien e një automjeti “Mercedes S AMG”. Për këtë veprim ishte parashikuar një pagesë prej 2.000 euro, ndërsa dëmi i shkaktuar vlerësohet mbi 21 mijë euro.
Prokuroria e lidh këtë rast me një hetim më të gjerë ndaj një grupi të cilësuar si “kartel policor i drogës”, i përbërë nga ish-zyrtarë të forcave të rendit, të dyshuar për përfshirje në aktivitete të organizuara kriminale. /Përshtati Pamfleti/
Lini një Përgjigje