FLASH
Shkruar nga Pamfleti
Torino, qytet industrial dhe simbol i Italisë moderne, u kthye për disa orë në skenë përplasjesh të ashpra urbane, teksa një protestë e organizuar nga grupe të majta radikale dhe qendra sociale degjeneroi në dhunë të hapur kundër policisë dhe institucioneve shtetërore. Pamjet nga rrugët e qytetit verior tregojnë barrikada, bomba artizanale, gaz lotsjellës dhe një klimë që i ngjan më shumë trazirave sesa një manifestimi qytetar.
Sipas mediave italiane, protesta lidhej kryesisht me zhvendosjen dhe mbylljen e qendrës sociale “Askatasuna”, një strukturë e njohur për aktivitetet e saj politike radikale, e cila prej vitesh ishte kthyer në pikë referimi për lëvizjet autonome dhe anarkiste. Marshimi, ku morën pjesë qindra persona, përshkoi disa zona të Torinos, por situata doli jashtë kontrollit kur grupe protestuesish me fytyra të mbuluara nisën sulme të drejtpërdrejta ndaj forcave të rendit, duke hedhur bomba letre, shishe dhe objekte metalike.
Policia reagoi me gaz lotsjellës dhe mjete shpërndarëse, ndërsa në rrugë u ndezën kazanë mbeturinash për të krijuar barrikada. Bilanci paraprak flet për dhjetëra persona të lënduar, mes tyre disa efektivë policie, si dhe arrestime për dhunë dhe rezistencë ndaj autoriteteve. U raportuan gjithashtu dëme të shumta materiale, përfshirë vitrina dyqanesh të shkatërruara dhe automjete të dëmtuara.
Ngjarjet në Torino kanë shkaktuar reagim të fortë politik në Romë. Kryeministrja italiane Giorgia Meloni dënoi ashpër dhunën, duke theksuar se shteti nuk do të tërhiqet përballë grupeve radikale. Në deklaratat e saj, Meloni nënvizoi se protesta paqësore është e drejtë demokratike, por dhuna dhe sulmi ndaj policisë janë të papranueshme dhe do të përballen me tolerancë zero.
“Askush nuk mund të mendojë se mund të imponojë ideologjinë e tij me shkopinj, zjarr dhe bomba artizanale. Ligji dhe rendi nuk negociohen,” është linja që përcolli qeveria italiane, ndërsa ministri i Brendshëm paralajmëroi masa më të forta sigurie dhe hetime për identifikimin e organizatorëve realë të protestës.
Lini një Përgjigje