FLASH
Shkruar nga Pamfleti
Autoritetet turke kanë intensifikuar arrestimet në prag të Samitit të NATO-s në Ankara. Mes të arrestuarve është edhe komediani Deniz Goktaş, i akuzuar për fyerje të presidentit Recep Tayyip Erdoğan dhe nxitje të urrejtjes...
Autoritetet turke arrestuan të dielën dy gazetarë dhe dhjetëra aktivistë të opozitës në prag të Samitit të NATO-s, që zhvillohet më 7-8 korrik në Ankara. Sipas raportimeve, veprimet janë pjesë e një operacioni të gjerë sigurie përpara takimit të aleancës ushtarake.
Mes të arrestuarve ndodhet edhe komediani 32-vjeçar Deniz Göktaş, i njohur për satirën politike. Ai u arrestua të premten me akuzat për "nxitje të urrejtjes dhe armiqësisë" si edhe për fyerje të presidentit Recep Tayyip Erdoğan, pasi në shfaqjen e tij të fundit e kishte cilësuar kreun e shtetit si "diktator". Shfaqja, e publikuar në YouTube, ka grumbulluar rreth 11 milionë shikime brenda dhjetë ditësh.
Në samitin e NATO-s pritet të marrin pjesë drejtuesit e 32 vendeve anëtare të aleancës, përfshirë presidentin amerikan Donald Trump. Sekretari amerikan i Shtetit, Marco Rubio, e ka cilësuar takimin si një nga më të rëndësishmit në historinë e NATO-s.
Sipas raportimeve, gjatë javës së kaluar autoritetet turke arrestuan më shumë se 200 persona të dyshuar për terrorizëm, mes tyre edhe dhjetëra aktivistë mjedisorë në pension. Kritikët e qeverisë argumentojnë se këto masa janë pjesë e një fushate më të gjerë ndaj zërave kritikë, ndërsa qeveria i paraqet ato si masa të nevojshme për sigurinë.
Kryetari i Bashkisë së Stambollit, Ekrem İmamoglu, rivali kryesor politik i Erdoğanit, vazhdon të mbahet në burg dhe po gjykohet për akuza korrupsioni. Procesi gjyqësor pritet të vijojë edhe gjatë zhvillimit të samitit. Ndërkohë, edhe qindra kryetarë bashkish dhe zyrtarë të tjerë të opozitës përballen me procedime për akuza të ngjashme.
Rasti i Deniz Goktaş ka tërhequr vëmendje të madhe në opinionin publik turk. Komediani është bërë i njohur për satirën ndaj figurave politike, përfshirë edhe liderin e opozitës İmamoglu. Pas arrestimit të tij, shumë mbështetës shprehën solidaritet në rrjetet sociale.
Prokuroria e Stambollit bëri të ditur se arrestimi u krye pas 185 denoncimeve të qytetarëve lidhur me shfaqjen e regjistruar më 30 qershor në një teatër të hapur. Në Turqi, fyerja e presidentit përbën vepër penale dhe dënohet me deri në katër vjet burg.
Gjatë marrjes në pyetje, Göktaş deklaroi se nuk kishte synim të fyente presidentin apo besimet fetare dhe se deklaratat e tij ishin pjesë e satirës artistike. Lidhur me referencat ndaj Kuranit në shfaqje, ai tha se kishte shprehur vetëm një vlerësim personal dhe nuk kishte pasur qëllim të ofendonte besimtarët.
Edhe Drejtoria e Çështjeve Fetare në Turqi iu referua shfaqjes në predikimin e së premtes, pa përmendur emrin e komedianit, duke paralajmëruar se përdorimi i platformave digjitale për të tallur vlerat fetare "nën petkun e humorit" ndikon negativisht tek të rinjtë.
Deputeti i opozitës Namık Tan e krahasoi arrestimin me praktikat e periudhës së Sulltan Abdul Hamidit II, duke kujtuar ndalimin e shfaqjes "Cyrano de Bergerac" në Perandorinë Osmane për shkak të shqetësimeve të sulltanit lidhur me paraqitjen e personazhit kryesor.
Lini një Përgjigje