FLASH
Shkruar nga Pamfleti
Bllokimi i rrugës Librazhd–Pogradec ka detyruar drejtuesit e mjeteve të përdorin një alternativë të pazakontë: Rrugën Egnatia, një trase historike që daton që nga koha e Perandorisë Romake. Prej disa ditësh, kjo rrugë po shërben si devijim për qarkullimin, ndërsa aksi kryesor mbetet jashtë funksionit.
Segmenti rrugor dhe një urë në këtë aks kanë pësuar dëmtime të rënda si pasojë e lëvizjeve të tokës dhe problematikave gjeologjike. Çarjet e rrugës dhe degradimi i strukturës mbajtëse të urës kanë bërë që autoritetet të ndalojnë qarkullimin, për shkak të rrezikut për sigurinë.
Ndërsa automjetet kalojnë përmes Egnatias, kjo zgjidhje mbetet e përkohshme dhe nuk mund të përballojë në mënyrë afatgjatë fluksin e lëvizjes që mbulon aksi Librazhd–Pogradec, një korridor i rëndësishëm për lidhjen e zonës juglindore me pjesën tjetër të vendit.
Autoritetet kanë nisur procedurat për demontimin e urës së dëmtuar dhe po shqyrtojnë alternativa për një zgjidhje provizore, përpara ndërtimit të një strukture të re. Qëllimi është rikthimi sa më i shpejtë i qarkullimit normal në këtë nyje strategjike.
Deri në njoftim të ri, segmenti mbetet i mbyllur dhe përdoruesit e rrugës duhet të ndjekin devijimet e përcaktuara.
Situata ka sjellë edhe reagime politike. Partia Demokratike ka akuzuar qeverinë se paraliza e akseve në Juglindje nuk është thjesht pasojë e rrëshqitjeve natyrore, por lidhet me keqmenaxhimin e fondeve publike, një pretendim që shton debatin mbi përgjegjësitë për dëmtimin e këtij aksi të rëndësishëm.
Lini një Përgjigje