FLASH
Shkruar nga Pamfleti
Kajro kërkon aktivizimin e marrëveshjes së mbrojtjes arabe dhe koordinim me partnerët rajonalë përballë tensioneve me Iranin
Egjipti ka përsëritur dënimin e tij ndaj sulmeve iraniane në rajonin e Gjirit Persik dhe ka bërë thirrje për një qasje të re të përbashkët për sigurinë në Lindjen e Mesme.
Sipas mediave ndërkombëtare, ministri i Jashtëm egjiptian, Badr Abdelatty, gjatë konsultimeve me Arabinë Saudite, Katarin, Emiratet e Bashkuara Arabe, Bahreinin, Omanin dhe Gjermaninë, theksoi nevojën për zhvillimin e një vizioni të ri dhe gjithëpërfshirës për sigurinë rajonale, në bashkëpunim me partnerë rajonalë dhe ndërkombëtarë.
Abdelatty deklaroi se përparësi duhet t’i jepet sigurisë kombëtare arabe dhe aktivizimit të Marrëveshjes së Përbashkët të Mbrojtjes Arabe.
Ai propozoi gjithashtu formimin e një force të përbashkët arabe, të cilën e konsideroi si një mekanizëm të rëndësishëm për mbrojtjen e sigurisë dhe sovranitetit të shteteve arabe përballë kërcënimeve aktuale.
Gjatë bisedave telefonike të zhvilluara këtë mëngjes, ministri egjiptian përmendi sulmet e fundit në rajon, përfshirë atë kundër portit të Salalah në Oman, si dhe incidentet që kanë prekur Katarin dhe zona të tjera të Gjirit.
Ai shprehu refuzimin kategorik të Egjiptit ndaj, sipas tij, agresionit të vazhdueshëm të Iranit dhe kërkoi ndërprerjen e menjëhershme të veprimeve që, sipas Kajros, shkelin ligjin ndërkombëtar dhe rrezikojnë stabilitetin rajonal.
Lini një Përgjigje