FLASH
Shkruar nga Pamfleti
Një karabinier u plagos rëndë gjatë një përleshjeje me tre grabitës shqiptarë në një vilë në Martinsicuro, Alba Adriatica, Itali, më 19 nëntor 2024. Ngjarja ndodhi rreth orës 18:30, kur tre banditë me kapuç hynë me forcë për të grabitur shtëpinë.
Nëna e moshuar e pronarit, një Kryebrigadier i Karabinierëve në Kompaninë Alba Adriatica, që ndodhej në papafingo, alarmoi të birin. Kur karabinieri mbërriti dhe u identifikua, grabitësit e sulmuan brutalisht me kazmë, levë dhe shkopinj, duke e lënë të pavetëdijshëm. Ai u dërgua me urgjencë në Spitalin Giulianova, ku një ndërhyrje kirurgjikale i shpëtoi jetën.
Pas një hetimi nëntëmujor, Karabinierët identifikuan një 38-vjeçar shqiptar përmes gjurmëve të ADN-së të gjetura në një elektrik dore të përdorur gjatë grabitjes. I arratisur dhe me identitet të ndryshuar, i dyshuari u kap në Rovigo më 31 korrik 2025, falë bashkëpunimit me policinë shqiptare përmes Drejtorisë Qendrore të Policisë Kriminale.
Analizat e RIS në Romë konfirmuan përputhjen e ADN-së. Më 8 gusht 2025, gjyqtari i Teramos urdhëroi paraburgimin e tij për “tentativë vrasjeje” dhe “tentativë grabitjeje të rënduar”, urdhër i ekzekutuar në burgun e Rovigos.Hetimet zbuluan se krimi u krye nga një sindikatë italo-shqiptare e specializuar në vjedhje dhe grabitje në Itali.
Gjatë operacionit, u arrestuan edhe anëtarë të tjerë të grupit, përfshirë një të arratisur në Tortoreto më 15 mars 2025 dhe tre persona për zhvatje të rënduar më 28 prill 2025.
Lini një Përgjigje