FLASH
Shkruar nga Diplomatico | Pamfleti.net
Paqëndrueshmëria e Shtëpisë së Bardhë po kthehet në faktor rreziku për rendin ndërkombëtar...
Një analizë e publikuar në CNN evidenton një realitet shqetësues: Donald Trump nuk po perceptohet më thjesht si një lider kontrovers, por si një burim real paqëndrueshmërie për sistemin ndërkombëtar. Në mandatin aktual, sjellja e tij politike po karakterizohet gjithnjë e më shumë nga impulsiviteti, reagimet emocionale dhe vendimmarrja e paparashikueshme, duke e zhvendosur SHBA-në nga roli i një shtylle stabiliteti në një faktor ankthi global.
CNN thekson se ajo që më parë shihej si stil i ashpër komunikimi, sot po prodhon pasoja konkrete: aleatët nuk janë më të sigurt për vijimësinë e angazhimeve amerikane, tregjet financiare reagojnë me luhatje të forta ndaj çdo deklarate të papërpunuar, ndërsa diplomacia tradicionale amerikane duket e zëvendësuar nga vendime ad-hoc dhe mesazhe kontradiktore. Në këtë klimë, besimi, elementi kyç i lidershipit global, po gërryhet me shpejtësi.
Problemi thelbësor, sipas analizës, nuk është vetëm Trump si individ, por fakti se paqëndrueshmëria e tij po institucionalizohet. Kur politika e jashtme e një superfuqie varet nga humori ditor i presidentit, atëherë edhe aleancat më të forta fillojnë të rishikohen. Kryeqytete europiane dhe partnerë strategjikë të Uashingtonit po detyrohen të ndërtojnë plane rezervë, duke mos e marrë më si të mirëqenë rolin udhëheqës të Shtetet e Bashkuara në sigurinë globale.
Në këtë kontekst, paqëndrueshmëria politike amerikane po reflektohet drejtpërdrejt në arkitekturën e rendit ndërkombëtar. Një SHBA e paparashikueshme nxit fragmentarizim, rrit autonominë strategjike të aktorëve të tjerë dhe krijon hapësira për fuqi rivale që të testojnë kufijtë e sistemit aktual. Mesazhi që përcillet nga analiza e CNN është i qartë dhe i ftohtë: bota nuk po përballet më me një Amerikë që imponon stabilitet, por me një Amerikë që vetë po prodhon pasiguri.
Për vende të vogla dhe aleate besnike, përfshirë Shqipërinë, ky realitet kërkon maturi, lexime të ftohta strategjike dhe shmangie të iluzioneve. Kur qendra e gravitetit global lëkundet, mbijetesa diplomatike nuk varet nga retorika, por nga aftësia për t’u përshtatur me një botë gjithnjë e më të paqëndrueshme./Pamfleti
Lini një Përgjigje