FLASH
Shkruar nga Pamfleti
Drejtësi me receta politike: SPAK fsheh prova, ndan dosje dhe shpik akuza ndaj Ahmetajt!
Ish-zëvendëskryeministri Arben Ahmetaj ka publikuar dokumente tronditëse që hedhin dritë mbi mënyrën se si po manipulohet procesi penal ndaj tij në çështjen e ashtuquajtur “BUKA Sh.a”.
Nga fshehja e provave, te tërheqja e akuzës kryesore nga vetë prokuroria, e deri te ndarja e dosjes në kundërshtim me vendimet e gjykatës, rasti merr përmasat e një persekutimi personal dhe politik.
Sipas Ahmetajt, në dokumentet e bëra publike, prokurori i çështjes Elvin Gokaj e ka nisur hetimin me pretendimin se zyrtari i lartë kishte dëmtuar interesat e shtetit shqiptar gjatë procedurave të privatizimit. Por në seancën e gjykimit paraprak, kjo akuzë u tërhoq me një justifikim absurd nga prokurori: “është lapsus imi.” Ky akt, i paprecedentë në një çështje penale me ngarkesë politike, shton dyshimet se kemi të bëjmë me një ndjekje të porositur. Siç thotë edhe vetë Ahmetaj: “Ta ngarkojmë këtë, se e ka kthyer i madhi në target”.
Por problemi nuk mbaron me “lapsuset” e prokurorit. Nga dokumentet e analizuara, rezulton se janë shmangur dhe fshehur prova që do të çonin në zbardhjen e të vërtetës. Komunikime telefonike, dëshmi të personave të pyetur, madje edhe rikthimi misterioz i disa telefonave celularë pa u analizuar përmbajtja – të gjitha këto tregojnë për një manovër të qëllimshme për të mos përfshirë të tjerë në skemën e hetimit. Avokati i Ahmetajt, në një nga debatet e përfshira në dokument, ngre zërin: “Prokuroria nuk po kërkon drejtësinë; po kërkon që t’i shërbejë një narrative të imponuar.”
Një tjetër manovër që trondit themelet e një procesi të drejtë është ndarja artificiale e çështjes në dy pjesë, pavarësisht një vendimi të gjykatës që e ndalonte këtë. Ky veprim, siç thuhet edhe në debatet mes avokatëve dhe prokurorit, ka vetëm një synim: të izolojë Ahmetajn si fajtorin e vetëm, ndërsa të tjerët, përfshirë figura me ndikim ekonomik dhe institucional, të mbeten jashtë përgjegjësisë.
Më tej, prokurori ka ndërtuar një akuzë të re, këtë herë duke pretenduar se Ahmetaj nuk ka zbatuar një vendim të Gjykatës Kushtetuese. Por faktet në dosje dhe akti i rivlerësimit të aseteve të kompanisë BUKA Sh.a, tregojnë të kundërtën: pas vendimit të Kushtetueses, vlera e aksioneve është trefishuar, duke garantuar interesin si të shtetit, ashtu edhe të privatit. Në vend që të konsiderohet si një sukses i administrimit institucional, kjo përpjekje e Ahmetajt për t’i dhënë më shumë vlerë aseteve publikohet si "krim".
Në një moment tjetër domethënës, në dokumentet e zbardhura, prokurori përdor gjuhë paragjykuese dhe personale ndaj vetë të pandehurit. Për më tepër, shprehet me ironi për mungesën fizike të Ahmetajt në sallë, duke shkelur parimin themelor të të drejtave të njeriut dhe të prezumimit të pafajësisë. Siç komenton Ahmetaj: “Po të ishte i pavarur, s'do bridhte rrugëve të Europës. Hajde reformë në drejtësi, hajde.”
Në dokumentin shtesë të publikuar, gjendet edhe akti i vlerësimit të aseteve, një provë kyçe që rrëzon pretendimet e prokurorisë. Aty, me të dhëna konkrete për mënyrën se si vlerësohet një shoqëri aksionere dhe për çmimet e referencës të përdorura, bëhet e qartë se procesi është ndjekur në përputhje me ligjin për privatizimin e aseteve shtetërore.
Në këtë kontekst, akuzat marrin formën e një instrumenti politik. Nuk ka asnjë referencë ligjore të qartë në aktakuzë që të provohet shkelja e ndonjë ligji konkret. Çmimi i metrave katrorë në kuzhinë dhe dhomë gjumi nuk është normë ligjore, por alibi e një organi akuzues që duket se i ka marrë urdhrat nga lart.
Arben Ahmetaj e mbyll reagimin e tij me një thirrje për transparencë: “Shpresoj që ti lexoni këto dokumente dhe të nxirrni konkluzion vetë. Pyetni një vlerësues të pavarur se si bëhen këto vlerësime. Unë e kam në kurriz këtë gjë; e di mirë pse e kanë sajuar.”
Fshehje provash dhe shmangie procedurash, dosje e ndarë në mënyrë të paligjshme
Një ndër shqetësimet më serioze të ngritura nga mbrojtja ka të bëjë me faktin që prokuroria ka shmangur prezantimin e provave kyçe para gjykatës. Në dokumentet e analizuar, vërehet qartë se:
Janë rikthyer disa telefona celularë, pa u analizuar përmbajtja e tyre digjitale;
Janë mbajtur jashtë dosjes disa komunikime telefonike që mund të ndriçonin pjesëmarrjen e aktorëve të tjerë;
Janë lënë jashtë deklarata të dëshmitarëve, të cilat sipas avokatit Ligori, “do të nxirrnin një panoramë tjetër përgjegjësie ligjore.”
Avokati Henrik Ligori, në një nga seancat e regjistruara, thekson: “Prokurori nuk ka paraqitur të gjitha veprimet hetimore në përputhje me detyrat që gjykata i kishte lënë. Ka shmangur prova, ka vonuar dorëzimin e akteve dhe ka ndarë çështjen në mënyrë të paligjshme, vetëm për të izoluar Ahmetajn.”
Pavarësisht një vendimi të mëparshëm të gjykatës që ndalon ndarjen e çështjes, prokuroria ka bërë pikërisht këtë. Kjo manovër, sipas mbrojtjes, i shërben vetëm një qëllimi: të mos përfshihen në përgjegjësi personat e tjerë të implikuar dhe të ruhet iluzioni i një procesi penal kundër një figure të vetme.
Një akuzë pa ligj dhe një prokuror që s’respekton Kushtetutën
Akuzat e reja të ngritura nga prokuroria lidhen me pretendimin se Ahmetaj nuk ka zbatuar një vendim të Gjykatës Kushtetuese për rivlerësimin e aseteve. Por vetë dokumentet e dosjes, si edhe akti i rivlerësimit, e përgënjeshtrojnë këtë.
Sipas këtij akti, vlera e aksioneve është trefishuar, në përputhje me një proces profesional vlerësimi të pavarur. Ky rivlerësim ka rritur vlerën si për shtetin, ashtu edhe për subjektin privat, duke përmirësuar interesin publik, jo duke e dëmtuar atë.
Ahmetaj pyet: “Në bazë të cilit ligj unë duhet të rivlerësoja vetëm aksionet e privatit? A ka ndonjë ligj për shoqëritë aksionare apo për privatizimin që e kërkon këtë? Prokurori ose nuk e njeh ligjin, ose nuk do ta lexojë.”
Në këtë logjikë të përmbysur, mbrojtja e interesit shtetëror po paraqitet si krim. Gjuhë e përdorur nga prokurori në sallën e gjyqit ka qenë gjithashtu objekt kritike, pasi ai shfaq paragjykim personal dhe përdor ton ironik në lidhje me mungesën fizike të të pandehurit, pavarësisht se përfaqësimi me prokurë është i ligjshëm dhe i njohur nga gjykata.
Një drejtësi që s’kërkon të vërtetën, por fajtorë të porositur
Ahmetaj i drejtohet publikut me një apel të qartë: “Shihni dokumentet vetë, pyesni një vlerësues të pavarur si bëhen këto rivlerësime. Unë nuk kam shkelur asnjë ligj. Por kam shkelur interesat e atyre që duan drejtësi me porosi, prandaj sot jam në shënjestër.”
Ndërkohë, avokati Ligori përmbyll qëndrimin e tij në seancë me një pasazh të fortë: “Ky nuk është gjykim penal mbi një akt të paligjshëm. Ky është një proces që i ngjan më shumë një tribunali politik sesa një gjykate të drejtë.”
Rasti “BUKA Sh.a” është kthyer në një pasqyrë të zymtë të mënyrës sesi drejtësia shqiptare po përdoret si mjet goditjeje selektive. Me dokumente të manipuluara, prova të fshehura dhe akuza të ndërtuara mbi “lapsuse”, ky nuk është një proces për të zbardhur të vërtetën, por një mision për të goditur një figurë të caktuar. E ndërsa drejtësia hesht, gjykimi real bëhet nga opinioni publik.
Njoftimi i plotë i Ahmetajt për mediat
Do të lutesha ta lexonit me kujdes se si prokurori, i cili në fillim më akuzonte se kam dëmtuar shtetin, e tërheq këtë akuzë për dëmtim të shtetit. Si po ky prokuror fsheh provat përpara gjykatës për të mbrojtur personat e përfshirë në dosje; që nga telefona të caktuar që janë rikthyer, komunikime telefonike në këta telefona që janë fshehur, deri te dëshmi të personave të pyetur të cilat nuk paraqiten.
Që nga korriku i vitit 2022, kur kjo çështje u mor nga SPAK, në media dhe gjithandej përflitej se unë akuzohesha për dëmtim të shtetit. Kjo gjë u shkrua edhe në akuzë. Ndërkohë, në seancën e gjykimit paraprak, prokurori tërheq akuzën e bërë nga vetë dora e tij, e shkruar e zeza mbi të bardhë, se unë kam dëmtuar shtetin. "Është lapsus imi..." deklaron. A është kjo qesharake? Është tendencioze akuza e dikurshme? Po. “Ta ngarkojmë këtë, se e ka kthyer i madhi në target.”
Së dyti, po ta shikoni në dokumentin e bashkangjitur, ka një moment ku debati Prokuror-Avokat lidhet me ndarjen e kësaj çështjeje në dy pjesë – një stil tashmë i konsoliduar i organit të akuzës për të devijuar të vërtetën. Megjithëse ka vendim gjykate që të mos ndahet kjo çështje, prokurori e ka ndarë çështjen sepse ashtu i konvenon. Por cila është arsyeja? Të mos dalë panorama e së vërtetës së plotë, duke fshehur faktet, duke mos ngarkuar me përgjegjësi ata që janë pjesë.
Së treti, prokurori në akuzë pretendon se s’kam zbatuar vendimin e Gjykatës Kushtetuese.
Prokurori që vetë nuk e zbaton vendimin e gjykatës, më akuzon mua për moszbatim të vendimit të Gjykatës Kushtetuese, edhe pse në rastin tim kjo gjë nuk është e vërtetë. Fakti që aksionet, në konsekuencë të rivlerësimit të pavarur të kryer nga vlerësues të pavarur, tregon se vlera e aseteve dhe aksioneve për këtë shkak është trefishuar, rrëzon edhe këtë pretendim.
Dhe ky vlerësim është për të gjitha palët – shtetin dhe privatin. Pra, aksionet si të shtetit, ashtu edhe të privatit, janë trefishuar me rivlerësimin.
Pretendimi i ri i prokurorit është: “Pse s’kam vlerësuar vetëm privatin?” Në bazë të cilit ligj e neni duhet ta bëj këtë? A ka ligj për Shoqëritë Aksionare? A ka ligj për privatizimin e aseteve shtetërore?
Sigurisht që ka. Por prokurori ose nuk e njeh, ose nuk do t’i lexojë, pasi në bazë të tyre unë nuk kam shkelur asnjë ligj. Ashtu siç nuk përmend asnjë ligj që unë kam shkelur në akuzën e ngritur prej tij apo prej Ramës.
Ku është parë, dhe në cilin ligj shkruhet, që kur vlerësohet një shtëpi, metrat katrorë të kuzhinës vlerësohen me 200 lekë, ndërsa ato të dhomës së gjumit me 50 lekë?
Nëse unë do ta kisha bërë këtë vlerësim për të cilin po akuzohem, do të meritoja të akuzohesha për atë që më bëjnë tani. Domethënë, duke mbrojtur interesat e shtetit dhe të privatit në të njëjtën kohë, paskam bërë këtë “krim të domosdoshëm”, se ju më doni në burg.
Së katërti, shiheni gjuhën që përdor prokurori. Po të ishte i pavarur, nuk do të bridhte rrugëve të Europës. Ku e gjen të drejtën të paragjykojë për prezencën apo mosprezencën time në sallën e gjyqit, e cila është zgjedhje sovrane e çdo individi. Hajde Reformë në Drejtësi, hajde. E mbani mend deklaratën për dosje voluminoze që as i lexon?
Në dokumentin e bashkëngjitur (WeTransfer) gjeni aktin e vlerësimit, ku do të shihni çmimin e referencës për vlerësimin e aseteve.
Shpresoj t’i lexoni këto dokumente dhe të nxirrni konkluzion vetë. Më tej, pyesni për kuriozitet një vlerësues të pavarur tjetër se si bëhen këto vlerësime dhe si rivlerësohet një sh.a (shoqëri tregtare).
Nuk është se habitem me këtë gjë, që dikush e quan qesharake. Unë, që e kam në kurriz, e di mirë pse e kanë sajuar edhe këtë akuzë.
Fatkeqësisht, një pjesë prej jush nuk e keni ndarë kurrë qëndrimin tim me shikuesit apo lexuesit tuaj – por kjo është çështje që lidhet me interesat e mediave që ju drejtoni. /Pamfleti
*Për të parë aktin e ekspertimit klikoni KETU
SPAK një mashë në duar e përgjakura e të supërkorruptuara të pushteteve të ramavicërve, që c’do ditë të vitit vetëm se mashtrojnë për të grabitur e shqyer prenë e rradhës, popullin. Harrojnë këto djaj se e drejta zhytet por kurrë nuk mbytet, ajo vetëm se triumfon në jetë. Grabitja e fundit, falja e borxheve miliarda dollarëshe bizneseve flet qart, që drejtësia ka shkue në drejtim të “pa ditur”, tregon qartë kapjen e kësaj palodrejtësie nga banda supërkorruptive ramavicjane. Në këte kënd vështrim pooullit e në vecanti pensionistëve e rinis i mbetet në dorë vetëm PROTESTA, si e vetmja mënyrë demokratike që me mbështetjen ndërkombëtare të pastrojnë të katër pushtetet e kapura prej mostrave e mijve të kënetës diktaturës komuniste. Vetëm atëher ditë më të mira do të vijnë.