FLASH
Shkruar nga Pamfleti
Një nënë 47-vjeçare nga Ohio ka humbur jetën pas komplikacioneve të dyshuara nga një operacion estetik në bark, vetëm dhjetë ditë pasi iu nënshtrua ndërhyrjes kirurgjikale. Rachel Tussey u konfirmua e vdekur të martën, pasi kishte kaluar disa ditë në gjendje kritike pas operacionit. Ajo kishte dokumentuar gjithë rrugëtimin e saj drejt transformimit fizik në rrjetin social TikTok, ku ndiqej nga rreth 25 mijë persona.
Para operacionit, Rachel kishte ndarë me ndjekësit edhe momentet e konsultës me mjekun, duke u kërkuar atyre të luteshin për të. Në një nga videot e saj ajo shprehej se kishte pritur gjatë për këtë ndërhyrje dhe besonte se gjithçka do të shkonte mirë.
Pas operacionit, bashkëshorti i saj Jeremy tregoi se gjërat nuk kishin shkuar sipas planit. Ai tha se fillimisht mjeku e kishte siguruar se ndërhyrja kishte përfunduar me sukses.
Por pak më vonë, ndërsa Rachel po merrte medikamente kundër dhimbjes, gjendja e saj u përkeqësua papritur. Sipas tij, fytyra e gruas ndryshoi ngjyrë dhe ajo humbi ndjenjat. Infermierët nisën menjëherë procedurat e reanimimit dhe më pas u thirr urgjenca. Rachel u dërgua me ambulancë në TriHealth Bethesda North Hospital, ku u vendos në aparatura për mbajtjen artificiale të jetës.
Bashkëshorti i saj tha se gruaja kishte mbetur pa oksigjen për më shumë se gjashtë minuta dhe më vonë mjekët i komunikuan familjes se ajo kishte pësuar vdekje cerebrale. Pas disa ditësh pritjeje, familja mori vendimin e dhimbshëm për ta shkëputur nga aparaturat që e mbanin në jetë.
Jeremy deklaroi se dëshiron të zbulojë se çfarë ndodhi realisht gjatë operacionit, duke lënë të kuptohet se mund të ketë pasur neglizhencë mjekësore.
Lini një Përgjigje