FLASH
Shkruar nga Pamfleti
Angli - Shqipëri tanimë ka nisur, të paktën në tribuna. Dy skuadrat përballen sot në orën 20:45 në Londër, por tifozët e kombëtares shqiptare kanë shkelur të parët në "Wembley" paçka 'luftës' dhe përplasjes së tyre me Federatën Shqiptare të Futbollit.
Tifozat Kuq e Zi dhe grupimet e tjera të kombëtares kanë akuzuar FSHF-në se i ka përjashtuar nga dhënia e një numri të caktuar biletash për anëtarët e tyre, çka sjell edhe zbehjen e mbështetjes së organizuar në tribuna. FSHF tha në një njoftim të dytë se të gjitha biletat do dalin online, duke mos pasur një marrëveshje mes tyre.
Paçka se FSHF "i përjashtoi" nga stadiumi, Tifozat Kuq e Zi dhe "Illyrian Elite" janë tanimë në stadium dhe po përgatisin dekorin.
Gjashtë herë janë përballur skuadrat në histori mes tyre, në të gjitha rastet për kualifikueset e Kupës së Botës. Në secilin rast Anglia ka fituar, teksa Shqipëria edhe këtë herë kërkon të bëjë surprizën, qoftë edhe me një barazim. 19 gola ka shënuar Anglia në portën tonë, kundrejt vetëm një të kuqezinjve, në 28 marsin e largët 2001, realizuar nga Altin Rraklli në "Qemal Stafa".
Dueli i fundit daton më 12 nëntor 2021, kur Anglia na mposhtet po në "Wembley" me shifrat 5-0. Kejn me tre gola, Henderson dhe Megajër ishin autorët e golave.
Sa i takon renditjes në FIFA edhe ajo flet shumë. "Tre Luanët" mbajnë pozitën e katërt në botë, kundrejt vendit të 65 të tanëve.
Në stadiumin mitik të Londrës kapaciteti i ulëseve është afro 90 mijë, ndërsa kuqezinjtë ia kanë dalë të sigurojnë diku te 20 mijë bileta. Duke qenë se shumë shqiptarë janë rezident në Angli, ata ia kanë dalë të marrin bileta në shumë sektorë të stadiumit, paçka se numri i dedikuar për tifozët e Shqipërisë në këtë ndeshje sipas rregullores do duhet të ishte jo më shumë se 5600.
Lini një Përgjigje