FLASH
Shkruar nga Pamfleti
Futbolli anglez ka humbur një nga figurat më të veçanta të historisë së tij. Ken Bates, ish-pronari i Çelsit dhe Lids Junajtid, është ndarë nga jeta në moshën 94-vjeçare.
Emri i Bates u bë i njohur në vitin 1982, kur ai bleu Çelsin për vetëm 1 paund, në një periudhë kur klubi londinez ndodhej në një situatë të vështirë financiare dhe militonte në kategorinë e dytë të futbollit anglez.
Gjatë dy dekadave në drejtimin e klubit, Bates luajti një rol të rëndësishëm në stabilizimin dhe transformimin e Çelsit. Ai investoi në rikthimin e klubit në rrugën e duhur, duke krijuar bazat mbi të cilat më vonë do të ndërtohej një epokë e re suksesi.
Në vitin 2003, pas 21 vitesh në krye të klubit, Bates e shiti Çelsin për rreth 140 milionë paund te Roman Abramoviç. Shitja shënoi fillimin e një periudhe të artë për londinezët, me miliarderin rus që më pas e ktheu klubin në një nga fuqitë më të mëdha të futbollit europian.
Edhe pse vitet e tij në krye të Çelsit shpesh u shoqëruan me debate, Ken Bates mbetet një figurë e rëndësishme në historinë e klubit. Ai do të kujtohet gjithmonë si njeriu që bleu Çelsin për një paund dhe hodhi themelet e një transformimi që ndryshoi përgjithmonë fatin e skuadrës londineze.
Lini një Përgjigje